އަޅުގަނޑަށް ރާއްޖޭގެ ރައީސުލް ޖުމްހުރިއްޔާ ކަން ލިބިއްޖެނަމަ އަޅުގަނޑުވެސް ފުއްދައިދޭނެ ކަމަށް ބުނާ ގިނަ ވައުދުތަކެއް އެބަހުއްޓެވެ! އޭގެ ތެރެއިން ބައެއް ކަންތައް ލިސްޓްކޮށްލާނަމެވެ!
1- ފުރަތަމަ ކަމަކަށްވެސް އަޅުގަނޑު ކުރާނެކަމަކީ ސައުދީ އަރަބިއާ ފަދަ ރަހުމަތްތެރި އަރަބި ގައުމު ތަކުން އަށް ސަތޭކަ މިލިއަން ޑޮލަރުގެ އެހީގެ ޕެކޭޖެއް ހޯދުމަށްފަހު ރާއްޖޭގެ ބޭރު ދަރަނި އެއްކޮށް ދައްކައި ޚަލާސްކޮށްލާނީއެވެ.
މިވަގުތު ރާއްޖެއިން ބޭރު ޤައުމުތަކަށް ދައްކަންޖެހޭ ދަރަނީގެ ޖުމްލަ އުޅެނީ ބާރަ ބިލިއަން ރުފިޔާގައެވެ. އެއީ ގާތްގަޑަކަށް އަށްސަތޭކަ މިލިއަން ޑޮލަރެވެ. އެހެންކަމުން އަރަބި ރަހްމަތްތެރި ގައުމުތަކުނާއި ޗައިނާ ފަދަ އެހެން ރަހްމަތްތެރި ގައުމުތަކުން، ޖުމްލަ ފަސް ސަތޭކަ މިލިއަން ޑޮލަރުގެ އެހީ ހޯދިއްޖެނަމަ، އޭގެ ތެރެއިން ދައުލަތުން ތިން ސަތޭކަ މިލިއަން ޑޮލަރު ލުމަށްފަހު ހުރިހާ ދަރަންޏެއް ދައްކައި ޚަލާސްކުރެވިދާނެއެވެ.
ސަރުކާރުން ދައްކަން ބޭނުންވީމަ މަދު ދުވަސްކޮޅެއްގެ ތެރޭގައި އިންޑިއާއިން ނަގާފައިވާ ސަތޭކަ މިލިއަން ޑޮލަރުގެ ލޯނުވެސް ދައްކައި ހަލާސްކުރީއެވެ. އެހެންކަމުން 300 މިލިއަން ޑޮލަރުވެސް ދެއްކީމަ ދެއްކޭނެއެވެ.
މިގޮތަށް މިވާހަކަ ދެއްކުމުން ބައެއް މީހުން ބުނެފާނެއެވެ! ރަހްމަތްތެރި ގައުމުތަކުން އެއްބިލިއަން ޑޮލަރު ހޯދާނީ ކިހިނެކުންތޯއެވެ!
މިއަހަރު ޖެނުއަރީ މަހުވެސް ސައުދީ އަރަބިއާއިން ވަނީ ހަމައެކަނި ފަލަސްޠީނަށް ވެސް ސަތޭކަ މިލިއަން ޑޮލަރުގެ ހިލޭ އެހީ ދީފައެވެ. އެހެން ކަމުން މަސައްކަތް ކޮށްފިނަމަ ރަހްމަތްތެރި ހުރިހާ ގައުމުތެކެއްގެ އެހީގައި ކުރު މުއްދަތެއްގެ ތެރޭ ރާއްޖޭގެ ދަރަނި ދައްކައި ޚަލާސް ކުރެވިދާނެއެވެ!
2- އަޅުގަނޑުގެ ދެވަނަ ވައުދަކީ ބޭރުގެ ދަރަނިތައް ދައްކައި ޚަލާސްކުރުމަށް ފަހު ރާއްޖޭގެ ފޮރިން ކަރަންސީ ރިޒާވް އެއްބިލިއަން ޑޮލަރަށް އެރުވުމެވެ. މިއީވެސް ރޭވުންތެރިކަމާއި އެކު މަސައްކަތް ކޮށްފިނަމަ ނުކުރެވޭނެވަރުގެ ކަމެއް ނޫނެވެ!
3- އަޅުގަނޑަށް ރާއްޖޭގެ ރައީސްކަން ލިބިއްޖެނަމަ އަޅުގަނޑު ފުއްދައިދޭން ވައުދުވާ ތިންވަނަ ކަމަކީ ކުވައިތު ފަންޑު ފަދަ ގައުމީ ފަންޑެއް ތައާރަފްކުރުމެވެ.
އެފަދަ ފަންޑެއް ވެގެންދާނީ ރައްޔިތުން ނުވަތަ ދައުލަތް ހާލުގައި ޖެހިޖެނަމަ ބޭނުން ކުރާނެ އެއްޗެއްގެ އިތުރުން، ދައުލަތުގެ ވިޔަފާރިތަކަށް އިންވެސްޓް ކުރާނެ ފަންޑަކަށެވެ. މިއީ ވަރަށް ކާމިޔާބު ކަމާއިއެކު ކުރެވިދާނެ ކަމުގެ ހެއްކަކަށް މިހާރުގެ ޕެންޝަން ފަންޑު ފުދެއެވެ. ކުރު މުއްދަތެއްގެ ތެރޭ ޕެންޝަން ފަންޑުގައި މިހާރު އެއްބިލިއަނަށް ވުރެ ގިނަ ރުފިޔާ އެބަހުއްޓެވެ. ޕެންޝަން ފަންޑުން ދަނީ ދިރާގާއި، ހައުސިން ކުންފުނި ފަދަ މުއަސަސާތަކުގައި ބޮޑެތި އަދަދުތަކުން އިންވެސްޓް ކުރަމުންނެވެ.
މިފަދަ "ދިވެހި ފަންޑް" އެއް އޮވެއްޖެނަމަ އެސްޓީއޯގެ ކޭޝްފްލޯއަށް ދައުލަތުން މިހާރު ބަރޯސާވާ ގޮތަށް ބަރޯސާވާކަށް ނުޖެހޭނެއެވެ. މިފަދަ ފަންޑެއްގެ ގަވާއިދެއް އެކުލަވާލާގޮތުން، ދައުލަތަށް އިިންޓްރަސްޓަކާއި ނުލައި އެފަންޑުން ލޯނު ލިބޭގޮތަށް ވެސް ހަމަޖެއްސިދާނެއެވެ.
"ދިވެހި ފަންޑަށް" މައިގަނޑު އާމްދަނީއެއް އަޅުގަނޑު ހޯދާނީ މީރާއަށް ލިބޭ ޓެކްސްގެ ފަހެއް އިން ސައްތަ ނުވަތަ ފަސް ޕަސެންޓް އެފަންޑަށް ޖަމާކޮށްގެންނެވެ. މިހާރުވެސް މީރާއަށް އަހަރަަކު ގާތްގަޑަކަށް ނުވަ ބިލިއަން ރުފިޔާގެ ޓެކްސް ލިބެއެވެ. މިއަދަދުގެ ފަސް ޕަސެންޓަކީ 450 މިލިއަން ރުފިޔާއެވެ. އެހެން ކަމުން ހަމައެކަނި މިފައިސާއަށް ބަރޯސާ ކުރިއަސް "ދިވެހި ފަންޑަށް" އަހަަރަކު 450 މިލިއަން ރުފިޔާ ލިބޭނެއެވެ!
4- އަޅުގަނޑުގެ ހަތަރުވަނަ ވައުދަކީ އަޅުގަނޑަށް ރައީސްކަން ލިބޭތާ ހަމަސް ދުވަހުތެރޭ ދިވެހި ބެންކްގެ ގޮތްޕެއް ސްރީލަންކާގެ ވެރިރަށް ކޮޅުބުގައި ގާއިމް ކުރުމެވެ. ހަމައެއާއިއެކު ރާއްޖެގައި އޯފްޝޯ ބެންކެއް ގާއިމްކޮށް ދިވެހި ބެންކުގެ ވިޔަފާރި ބައިނަލްއަގްވާމީ ދުނިޔެއަށް ހުޅުވާލާނަމެވެ.
5- އަޅުގަނޑުގެ ރިއާސީ ފަސްވަނަ ވައުދަކީ ދުނިޔޭގެ ދުނިޔޭގެ އެހެން ގައުމުތަކާއި ފައިހަަމަކުރުމުގެ ގޮތުން ހުޅަނގުގެ ބޮޑު ގައުމެއްގެ އެމްބަސީއެއް ރާއްޖޭގައި ގައިމް ކުރުމުގެ ވައުދެވެ. އެމެރިކާ ނުވަތަ އިނގިރޭސިވިލާތް ފަދަ ޤައުމެއްގެ އެމްބަސީ ރާއްޖެގައި ގާއިމްކުރެވިއްޖެނަމަ ހާރިޖީ ދާއިރާގައި ސްރީލަންކާގެ ހިޔަނިން ސަލާމަތްވެ، ހަށިފޮޅައިލުމުގެ ފުރުސަތު ރާއްޖެއަށް ފަހިވެގެންދަނެއެވެ.
ހަމައެއާއި އެކު އެމެރިކާ އާއި ގުޅުންބަދަހިކޮށް، ރާއްޖޭގެ ރައީސުލް ޖުމްހުރިއްޔާއެކު ވައިޓްހައުސްގައި އެމެރިކާގެ ރައީސްއާއި ބައްދަލު ކުރާ ފުރަތަމަ ރައީސަކަށް އަޅުގަނޑުވާނަމެވެ.
ޚާރިޖީ ދާއިރާގައި ޗައިނާއާއި ގުޅުން ވަރުގަދަކޮށް ޗައިނާގެ ވިޔަފާރިވެރިންނަށާއި، ޗައިނާ ޓޫރިސްޓުންނަށް ހާއްސަކޮށް އިންޑަސްޓްރިއަލް ޒޯނެއް ކަނޑައަޅާނަމެވެ.
ހުވަދު އަތޮޅުފަދަ ސަރަހައްދެއްގައި ބިން ހިއްކައިގެން ގިނަ ރަށްތަކެއް ގުޅުވާލައިގެން ހަދާ މިފަދަ ވިޔަފާރި ޒޯނެއްގައި ޗައިނާ ޓޫރިސްޓުން ގަޔާވާފަދަ ބޮޑެތި ޝޮޕިން މޯލް އާއި، ރިސޯޓާއި، ފައިވް ސްޓާރ ހޮޓަލާއި، ފެކްޓަރީތަކާއި، އޮފީސްތައްވެސް ހުންނާނެއެވެ.
އަޅުގަނޑުގެ ވެރިކަމެއްގައި ދިވެހި ވިޔަފާރިވެރިން ބެންކޮކަށް ގޮސް ވިސާ ހޯދަން ތިން ހަތަރު ގަޑިއިރު ފޯރމް ފުރައިގެން ކިއުގައި ތިބޭކަށް ނުޖެހޭނެއެވެ. ބެންކޮކަށްދާ ދިވެިންނަށް އޮން އެރައިވަލް އޮޓަމެޓިކް ވިސާ ލިބޭނެގޮތް ހަމަޖައްސާ ދޭނަމެވެ.
6- އަޅުގަނޑުގެ ހަ ވަނަ ވައުދަކީ ދިވެހި ގައުމީ ޔުނިވާސިޓީ އަކީ ކެމްޕަސް ޔުނިވާސިޓީއަކަށް ބަދަލުކޮށް އެތަނުގެ ކެމްޕަސް ހުޅުމަލެ އާއި ގުޅީފަޅުގައި ގާއިމް ކުރުމެވެ.
މިވައުދު ފުރިހަމަވެގެން ދާއިރު ވިލިމާލެ އާއި މާލެ އާއި ދެމެދު އޮންނާނީ ބްރިޖް އެޅިފައެވެ. އަދި މަލެ އާއި ހުޅުލެ ވެސް އޮންނަނީ ބްރިޖަކުން ގުޅާލެވިފައެވެ.
ގުޅީފަޅު، ވިލިމާލެ، އަދި މާލެ އާއި ހުޅުލެ އެއާޕޯޓް އަދި ހުޅުމާލެ، މި ފަސް ރަށް ބްރިޖްގެ ޒަރީއާއިން އެއްފަސްވުމުން ރާއްޖެހެ ތަރައްގީގެ ދުވެލި އެއިރު އޮންނާނީ ދެކުނު އޭޝިއާގެ ސިންގަޕޫރަށް ވުމަށްޓަކައި މެކުހަށް ޖަހާފައެވެ!