ރައްޔިތުންގެ މަޖިލީހުގެ ރައީސް އަބްދުﷲ މަސީހު އިންނަވާ ރިޔާސަތުގެ ގޮނޑިކޮޅު ވަށާ ބިއްލޫރި ކޮށްޓެއް ޖަހަން ގައުމީ ދިފާއީ ބާރުން ލަފާއަރުވައި ކަމަށް ގަލޮޅު ދެކުނު ދާއިރާގެ މެމްބަރު އަހުމަދު މަހްލޫފް ވިދާޅުވެއްޖެއެވެ.
މަހްލޫފް ކުރި ޓުވީޓެއްގައި ވިދާޅުވެފައިވަނީ މަގާމުގެ ދަހިވެތިކަން މިހާރު ވަނީ މަޖިލިސް ރައީސްގެ ހައްދުން ނައްޓާފައި ކަމަށެވެ. އެންމެ ފަހަކަށް މަޖިލީހުގެ ޖަލްސާއެއް ބޭއްވުމަށް ގިނަ އަދަދެއްގެ ސިފައިން މަޖިލިސް ޗެމްބަރ ތެރޭގައި ސެކިއުރިޓީ ބަލަހައްޓަން ބެހެއްޓުމުންވެސް މަސީހަށް މަޖިލީހުގެ ޖަލްސާ ވަނީ ބޭއްވޭ ގޮތެއް ނުވެފައެވެ.
އިދިކޮޅު މެމްބަރުން އިދާރީ މޭޒު ކައިރިއަށް އެއްވެ ޖަލްސާ ކުރިއަށް ގެންދެވޭނެ ގޮތެއް ނުވުމުން މަސީހް ވަނީ ރިޔާސަތު ދޫކުރައްވައި މަޖިލިސް ތަޅުން ދޫކޮށް ވަޑައިގެންފައެވެ.
ރައްޔިތުންގެ މަޖިލީހުގެ އިދިކޮޅު މެމްބަރުން ވަނީ މަޖިލީހުގެ ރައީސްގެ އިތުބާރު ނެތްކަމުގެ ވޯޓު ނުނަގާތީ ކަންބޮޑުވުން ފާޅުކޮށްފައެވެ. 45 މެމްބަރުންގެ ސޮޔާއެކު މަޖިލީހުގެ ރައީސްގެ އިތުބާރު ނެތްކަމުގެ ވޯޓު ނެގުމަށް ހުށައެޅުމުން މިދިޔަ ޖުލައި މަހުގެ 24 ވަނަ ދުވަހަށް ތާވަލުކުރުމަސްފަހު ވޯޓު ވަނީ ސަބަބަކާ ނުލާ ނުނެގުމަށް ނިންމާފައެވެ.