ސީރިޔާގައި ގިނަ ދުވަސްތަކެއް ވަންދެން ދެމިގެން ދިޔަ ހަނގުރާމައިން ސަލާމަތްވުމަށް އަމިއްލަ ވަޒަން ދޫކޮށް އެހެން ގައުމުތަކަށް ހިޖުރަކުރި ރެފިއުޖީންގެ ތެރެއިން ތުރުކީއަށް ދިޔަ ރެފިއުޖީންތަކަކަށް ގޯނާކުރި ކަމުގެ ތުހުމަތުގައި ތުރުކީ ސިފައިންތަކެއް ހައްޔަރުކޮށްފިއެވެ.
ތުރުކީ ސަރުކާރުން ސިފައިންގެ ބަޔަކު ހައްޔަރުކޮށްފައިވަނީ ސީރިޔާއާއި ތުރުކީ ވަކިކުރާ ބޯޑަރު ހުރަސްކޮށް ގަވާއިދާއި ޚިލާފަށް އެތެރެވާން އުޅުނު ރެފިއުޖީންތަކަކަށް ސިފައިން އަނިޔާކޮށް ފުރައްސާރަކުރާ ވީޑިއޯއެއް އިންޓަނެޓުގައި އާންމުވުމާއި ގުޅިގެންނެވެ.
ވީޑިއޯއިން ފެންނަ ގޮތުގައި ރެފިއުޖީންގެ ގައިގައި ސިފައިން ކޮޅުފައިން ޖެހުމަށްފަހު މަލާމާތުގެ ރާގަކަށް "ދެން ތުރުކީއަށް ވަންނާށޭ" ބުނެ ފުރައްސާރަކޮށްފައިވެއެވެ.
މިމައްސަލައާ ގުޅިގެން ތުރުކީ ސިފައިން ބުނެފައިވަނީ ރެފިއުޖީންނަށް އަނިޔާކުރި ސިފައިން މިހާރު ހައްޔަރުކޮށްފައިވާ ކަމަށެވެ. އަދި އަނިޔާތައް އަމާޒުވި ރެފިއުޖީންނަކީ މެޑިކަލް ޓެސްޓުން ފާސްނުވި ރެފިއުޖީން ކަމަށްވެސް އަސްކަރިއްޔާއިން ބުނެފައިވެއެވެ. މެޑިކަލް ޓެސްޓުން ފާސްނުވާ ރެފިއުޖީން ގައުމަށް ވަނުމުގެ ހުއްދަ ނުދީ އަނބުރާ ފޮނުވާލައެވެ.
ތުރުކީއިން ވަނީ ދާދި ފަހުން ރެފިއުޖީންނަށް ހިލޭ ބޭސް ފޯރުކޮށްދިނުން ހުއްޓާލާފައެވެ. މިހާރުވެސް 2.5 މިލިއަން ރެފިއުޖީން ތުރުކީގައި ވަޒަންވެރިވެފައިވާ ކަމަށް މައުލޫމާތު ލިބެއެވެ.