ދިވެހި ބަސް ހިމެނޭ ގޮތަށް "ބަހަބޯ" ގެ ނަމުގައި އާ ކުޅިވަރެއް ތަޢާރަފްކޮށްފި އެވެ.
ޤައުމީ ޔުނިވަސިޓީގެ ލައިބްރަރީން އިސްނަންގައިގެން އުދެއްދި މި ކުޅިވަރަކީ ސޯޅަ ކޮޑި ނުވަތަ ޑައިސް ބޭނުންކޮށްގެން، އޭގައި ހުންނަ އަކުރުތައް ބޭނުންކޮށްގެން، ދީފައިވާ ވަކި ވަގުތެއްގައި ބަސް ހަދައިގެން ކުޅޭ ކުޅިވަރެކެވެ. މި ކުޅިވަރުގައި ދޭކާއި، ތިނެއް، ހަތަރެއް އަދި ފަސް އަކުރުގެ ބަސް ހެދޭނެ އެވެ. މިއީ ސްކެރެބްލް ކަހަލަ ކުޅިވަރެކެވެ.
ޤައުމީ ޔުނިވަސިޓީން ބުނީ މިފަދަ ކުޅިވަރެއް ތަޢާރަފް ކުރުމުގެ ބޭނުމަކީ ދިވެހިބަހަށް ޢާއްމުން ހޭލުންތެރި ކުރުވައި ބަސް ދިރުވާ އާލާކުރުން ކަމަށެވެ.
އެގޮތުން މިކަމަށް ޙާއްސަ ކޮމިޓީއެއް ނަގައި ބަސްތަކެއް ހަދައި، ޤަވައިދާއި ކުޅޭނެގޮތުގެ އިރުޝާދު އަދި ކުޅިވަރުގައި ބޭނުން ކުރާނެ ސާމާނު ވަނީ ފަރުމާކޮށްފަ އެވެ.
ބަހަބޯއާ ބެހޭ ގޮތުން ބަސް ކޮމިޓީގެ ރައީސް އަބްދުއްރަޝީދު ހުސައިން ވިދާޅުވީ ޒަމާނާ އެއްގޮތަށް ބަހަށް ބަދަލު އަންނަން ޖެހޭ ކަމަށެވެ. އަދި ބަހަބޯ ފަދަ ކުޅިވަރުތަކަކީ މީގެކުރިންވެސް ކުޅެމުން އައި ކުޅިވަރުތަކެއްކަމަށާއި، މިހާރު އެކުޅިވަރުތައް މި ފެންނަނީ ޒަމާނާއެ އްގޮތަށް ހަދާފައިވާ ތަންކަމަށް ވިދާޅުވިއެވެ.
ކުޅިވަރު "ބަހަބޯ" ރަސްމީކޮށް ތަޢާރަފް ކުރަން ހަމަޖެހިފައި ވަނީ މިމަހުގެ 10 ވަނަ ދުވަހު އެވެ. އެއީ ޤައުމީ ލައިބްރަރީ ދުވަހެވެ.