އަންނަ މަހުގެ ހައެއްގައި އަޅުވާ ފިލްމް "ހައްދު" ގެ ލަވަތަކުގެ އޯޑިއޯ ރޭ އާންމުކޮށްފި އެވެ.
އެ ފިލްމުގެ އޯޑިއޯ ލޯންޗް ކުރަން ރޭ ސޯލްޓް ކެފޭގައި ބޭއްވި ހަފުލާގައި ފިލްމުގައި ހިމެނޭ ހަ ލަވައިގެ ތެރެއިން ފަސް ލަވަ އާންމުކޮށް ދޫކޮށްލައި، އެއް ލަވައިގެ ވީޑިއޯ ވެސް ވަނީ ދައްކާލައިފަ އެވެ.
އަބްދުލް ފައްތާހު ޑައިރެކްޓް ކުރާ "ހައްދު" ގެ ލަވަތަކުގެ ތެރެއިން ރޭ ވީޑިއޯ ދައްކާލީ މުހައްމަދު އަބްދުލް ޢަނީ (ތޭރަވާ) އާއި އޭނާގެ އަންހެނުން މަރިޔަމް އަޝްފާ ކިޔާފައިވާ "ބީހިލާށޭ" އެވެ. މި ލަވައިގެ ޅެން ވެސް ތޭރަ ހަދާފައިވާ އިރު، ލަަވައިގެ ރާގު ހަދާފައި ވަނީ ފަތޯ އެވެ.
މި ލަވައިގެ އިތުރުން "ހައްދު" ރޭ ދިރާގު މައި ޓޯންސް އާއި ސައުންޑް ކުލައުޑަށް ދޫކޮށްލާފައި ވަނީ "ގިރިޓީ ލޯބި"، "ތައުބާ"، "އުނދުހިލަމާ"، "ނޭދެން އަލިވިލޭކަށް" އަދި "ދުއާ" އެވެ. މި ހުރިހާ ލަވަތަކެއްގެ ޅެން ވެސް ހަދާފައި ވަނީ ތޭރަ އެވެ.
މުޅިން ވެސް އަމިއްލަ ރާގުގެ ލަވަތައް ހިމެނޭ "ހައްދު" ގެ ލަވަތަކުގެ މިއުޒިކް ހަދާފައި ވަނީ މިސްޓީ، ކުޑައިއްބެ، ކުޑަ ޝިޔާމް އަދި ފަތޯ އެވެ.
ރެކޯޑް ބްރޭކިން މޫވީއެއްގެ ގޮތުގައި ޕްރޮމޯޓް ކުރަމުން އަންނަ "ހައްދު" ގެ ލީޑް ރޯލް ކުޅެފައި ވަނީ އަލަށް ތައާރަފުވާ އަހުމަދު ޝިބާންއާ އެކު މަރިޔަމް އައްޒަ އާއި އައިމިނަތު ރިޝްފާ އެވެ.
އަންނަ މަހުގެ ހައެއްގައި އޮލިމްޕަހުގައި މި ފިލްމް ޕްރިމިއާ ކުރަން ނިންމާފައިވާ އިރު ހަތް ވަނަ ދުވަހުގެ ރޭ އައްޑޫގައި ވެސް "ހައްދު" ގެ ކުލަގަދަ ޕްރިމިއާއެއް އޮންނާނެ އެވެ.