މި މަހުގެ 10-12 އަށް މަރަދޫ ބޮޑޮގޭގައި ދިވެހި ފިލްމް "ނޯޓީ 40" އަޅުވަން ނިންމާފައިވާ އިރު، ފިލްމުގެ ޓިކެޓް މިއަދު ހަވީރު މަރަދޫ ބޮޑޮގޭ ކުރިމަތީގައި ވިއްކަން ފަށާ ގޮތަށް ހަމަޖައްސައިފި އެވެ.
ބޮޑޮގޭގައި އެ ފިލްމް އަޅުވާގެ ޓީމްގެ އޮފިޝަލަކު މިއަދު ބުނީ ޓިކެޓް ވިއްކަން ފަށާނީ ހަވީރު 4:00 ގައި ކަމަށެވެ. އެހެންވެ ޓިކެޓަށް ނަން ނޯޓް ކުރި މީހުންނާއި ޓިކެޓް ގަންނަން ބޭނުންވާ އެހެން މީހުންނަށް ވެސް ޓިކެޓް ވިއްކާނެ ކަމަށް ބުންޏެވެ.
"އަހަރަމެންގެ ވަރަށް ބޮޑު އެދުމެއް ނަން ނޯޓްކޮށްފައި ތިބި މީހުން ކުރީބައިގައި އައިސް ޓިކެޓް ނެގުމަކީ،" އޮފިޝަލް ބުންޏެވެ.
އޭނާ އަދި ބުނީ 12 ވަނަ ދުވަހާ ހަމައަށް ޝޯތައް ކުރިއަށް ގެންދާނީ ފިލްމަށް ލިބޭ ތަރުހީބަށް ބަލާފައި ކަމަށެވެ. ފިލްމްގެ ޓިކެޓާ ބެހޭ މައުލޫމާތު ހޮޓްލައިން ނަމްބަރު 7955243 އަދި 7845584 ގުޅައިގެން ހޯދޭނެ އެވެ.
ގިނަ ރަތަކެއް ހިމެނޭ މި ފިލްމުގެ ކާސްޓުންގެ ތެރޭގައި ޔޫއްޕެ، ނިއުމާ، އަލީ ސީޒަން، މުހައްމަދު މަނިކު އަހުމަދު ސައީދު، މަރިޔަމް އައްޒަ، އިބްރާހީމް ޖިހާދު (ޖިމީ)، ފާތުމަތު އާޒިފާ (އަޒޫ)، އަލީ އާޒިމް (ދޮންއައްޔަ) އަދި ނުޒުހަތު ޝުއައިބް (ނުޒޫ) ފަދަ ތަރިން ހިމެނެ އެވެ.
މި މަހުގެ 2 ވަނަ ދުވަހުގެ ރޭ ޕްރިމިއާ ކުރި "ނޯޓީ 40" ގެ ކާމިޔާބު ޝޯތަކެއް އޮލިމްޕަހުގައި އަންނަނީ ދައްކަމުންނެވެ.