ހިތަދޫގައި އިމާރާތް ކުރި ފްލެޓްތަކަށް ކުރިމަތިލި މީހުން ތިބީ އެ ފްލެޓްތަކުގައި އެ މީހުންނަށް ދިރިއުޅެވެން ފެށޭނެ ދުވަހެއްގެ އިންތިޒާރުގަ އެވެ. ފްލެޓް ތަކުގެ މަސައްކަތް ނިމިފައި ހުންނަތާ މިހާރު އެތައް ދުވަހެއް ވެއްޖެ އެވެ.
މިދިޔަ އަހަރުގެ ކުރީކޮޅު ފްލެޓްތަކަށް ކުރިމަތިލާން ހުޅުވުމާއި އެކު ވަރަށް ގިނަ ބަޔަކު އެ ފްލެޓް ތައް ހޯދުމަށް އެޕްލިކޭޝަން ހުށަހެޅިއެވެ. އޭގެ ތެރޭގައި ގިނައީ ބޯހިޔާވަހިކަމުގެ ދަތިކަން ހުރި އާއިލާތަކުގެ މީހުންނެވެ. އެއީ އެއްވެސް ހާލެއްގައި ފްލެޓްތަކެއް ތަނެއްގައި ހުރުމަކުން "މަޖަލަކަށް" ފޯމު ހުށަހެޅި މީހުންނެއް ނޫނެވެ.
އެހެން ނަމަވެސް ފާއިތުވި އަހަރެއްހާ ދުވަހަށް ބަލާއިރު ފެންނަނީ ހައުސިން މިނިސްޓްރީ އާއި ސަރުކާރުން އަމަލުކޮށްފައިވާ ގޮތުން ފްލެޓްތައް ދޫކުރުމުގެ ބަދަލުގައި "މަޖާކުރަން" އުޅޭ މަންޒަރެވެ.
"މަޖާކުރަން" އުޅޭއިރު މިއީ ސަރުކާރުން ރައްޔިތުންނަށް ހިލޭ ސާބާހަށް ދޭން އުޅޭ ތަންތަނެއް ވެސް ނޫނެވެ. މީން ފްލެޓަކަށް ރައްޔިތަކަށް ވަދެވޭނީ ސަރުކާރަށް ދައްކަން ޖެހޭ 25،000ރ. ގެ ޑައުންޕޭމަންޓް ވެސް ދެއްކުމަށް ފަހު އެވެ. އަދި މަހަކު 3،000ރ ގެ ކުއްޔަށް ވެސް ދައްކަން ޖެހެ އެވެ.
އެހެންވެ ފްލެޓްތަކަށް މި އަގުގައި ވެސް ބަޔަކު ކުރިމަތިލީ އެކަމަށް ބޭނުން ޖެހިފައި ތިބިލެއް ބޮޑުކަމުންނެވެ. ވީމާ މީގައި އޮތް ގޮތަކީ ހައްގުވާ މީހުންނަށް އިންސާފުވެރި ކަމާއި އެކު ފްލެޓްތައް ވީހާ ވެސް އަވަހަކަށް ހަވާލު ކުރުމެވެ. އެތަންތަން ވީރާނާ ވަންދެން ބަހައްޓާފައި، ބޮޑެތި މަރާމާތުތައް ކުރަން ޖެހޭ ހާލަތަށް ދިއުމުން ފްލެޓްތައް ލިބޭ މީހުން އުފަލަން ޖެހޭނެ ބުރަ ސަރުކާރުން ވިސްނާނަން ޖެހޭނެ އެވެ. މި ތަޖުރިބާ މި ގޮތަށް ފޭދޫގެ ރައްޔިތުންކޮށްފި އެވެ.
އެ އަވަށުގައި އެޅި 25 ހައުސިން ޔުނިޓް ދޫނުކޮށް ދެ އަހަރެއްގާ ދުވަސް ދަންމާލުމުގެ ސަބަބުން، އެތަންތަނަށް އާއިލާތައް ވަން އިރު އޮތީ ބޮޑުތަނުން މަރާމާތު ވެސް ކުރަން ޖެހިފަ އެވެ.
އެހެންވެ ހިތަދޫ ފްލެޓްކަށް ވަންނަ މީހުންނަށް އެ ހާލު ޖައްސައިގެން ނުވާނެ އެވެ. ހައުސިން މިނިސްޓްރީން ފްލެޓްތައް ދޫކުރާނެ ކަމަށް ބުނެ މިހާތަނަށް އެކި މުއްދަތުތައް ކަނޑައަޅައިފި އެވެ. އެކަމަކު މިހާތަނަށް ފެނިފައި ވަނީ ދައްކާ ވާހަކަތަކާ އަމަލާ ދިމާ ނުވާ ތަނެެވެ.
RYameen ge sarukaarun S.Hithadhoo gai binaa koffaivaa housing units thah:mi units thakuge haqquverinnaa units thah miaharu havaalu kureveyne pic.twitter.com/V1Nda1rXdz
— Dr.Mohamed Muizzu (@MMuizzu) July 29, 2017
އެންމެ ފަހުން ހައުސިން މިނިސްޓަރު ޑރ. މުހައްމަދު މުއިއްޒު މިދިޔަ މަހު ކުރެއްވި ޓްވީޓެއްގައި ވިދާޅުވަނީ މި އަހަރުގެ ތެރޭގައި ފްލެޓްތައް ހަވާލު ކުރާނެ ކަމަށެވެ. އެކަމަކު ތިޔަ ބުނާ އަހަރެއް އަންނާނީ ކޮން އިރަކުން ކަމެއް ނޭނގެ އެވެ.
ބައެއް މީހުން ތުހުމަތު ކުރާ ގޮތުގައި ހިތަދޫ ފްލެޓްތަކުން ސަރުކާރުން މިހާރު ބޭނުން ވަނީ ސިޔާސީ ފައިދާއެއް ނަގާށެވެ. އަންނަ އަހަރަކީ ރިޔާސީ އިންތިހާބު އޮންނަ އަހަރަށްވާތީ، މި ފްލެޓްތަކާ ސަރުކާރު ދެން އުޅޭނީ އިންތިހާބު ކައިރިވަމުންނެވެ. ރައްޔިތުންގެ ބޮލަށް "ޗިޕް ޖަހަން" މި ފްލެޓްތަކުގެ ބޭނުން ރިޔާސީ އިންތިހާބުގެ ކެމްޕޭނަށް ސަރުކާރުން ހިފާނެ އެވެ، ފްލެޓްތައް ދޫނުކޮށް ދަންމާ ސަބަބަކީ އެއީ އެވެ.
ސަރުކާރުގެ ހެޔޮފުޅުކަމުން ރައްޔިތުންނަށް ފްލެޓް ދިން ކަމަށް ދެއްކުމާއި އިންތިހާބުގައި ރައީސް އަބްދުﷲ ޔާމީނަށް ފްލެޓް ލިބޭ މީހުން ވޯޓްލާން މަޖުބޫރުވާ ކަހަލަ ގޮތަކަށް މި ފްލެޓްތައް ދޫނުކުރިޔަސް ރައްޔިތުންނަށް މިހާރު ވަރިހަމަ އެވެ.
ތި ފްލެޓްތައް ދޫކުރާނެ ކަމެއް ވެސް ނެތެވެ. އެހެން ތަންތަނުގައި "ތަޅު އަޅުވައިގެން" އުޅޭ އުސޫލުން ތިޔަ ފްލެޓްތަކުގައި ތަޅުވައިގެން ތިބޭށެވެ.