އަޖޭ ދޭވްގަން އާއި ރޯހިތު ޝެޓީގެ "ސިންގަމް" ގެ ފިލްމްތަކަކީ ވަރަށް ކާމިޔާބު ފިލްމްތަކެވެ. އޭގެ ދެ ފިލްމް މިހާތަނަށް ބެލުންތެރިންނާ ހަމައަށް އައިސްފައިވާ، ތިން ވަނަ ފިލްމެއްގެ ވާހަކަ ވެސް މިހާރު އަންނަނީ ދެކެވެމުންނެވެ.
އަޖޭއާ އެކު ކޮމެޑީ ފިލްމް "ގޯލްމާލް އެގެއިން" ގެ މަސައްކަތް މިހާރު ކުރަމުން ރޯހިތު ބުނީ "ސިންގަމް 3" ބެލުންތެރިންނަށް ގެނެސް ދޭނެ ކަމަށެވެ. އެކަމަކު އެކަން ވާނީ އޭނާ ހިތްހަމަޖެހޭ ވަރުގެ ސްކްރިޕްޓެއް ލިބުނު އިރަކުން ކަމަށް ބުންޏެވެ.
"ސިންގަމްއަކީ ވަރަށް ބޮޑު ބްރޭންޑެއް. އެހެންވީމާ ބެލުންތެރިންގެ އެކްސްޕެކްޓޭޝަނާ އެއްވަރުގެ ފިލްމެއް އަހަރެމެން ގެނެސް ދޭން ޖެހޭނީ ވެސް. ހަމަ އެއްޗަކަށް އެއްޗެއް ހަދާލުމަކީ ކުރާނެ ކަމެއް ނޫން،" އޭނާ ބުންޏެވެ.
ރީހިތު އަދި ބުނީ "ސިންގަމް" އާއި "ސިންގަމް 2" އަށް ލިބުނު ކާމިޔާބީން "ސިންގަމް 3" ހަދަން ވެސް ބޮޑު ހިތްވަރެއް ލިބިފައިވާ ކަމަށެވެ.
"އެހެންވީމާ ރަނގަޅު ސްކްރިޕްޓެއް ލިބޭ އިރަށް އޭގެ މަސައްކަތް ފަށާނަން،" ޗެންނައި އެކްސްޕްރެސް ފަދަ ކާމިޔާބު ފިލްމްތައް ހަދާފައިވާ ޑައިރެކްޓަރު ބުންޏެވެ.
ރރޯހިތު ބުނީ ދެން އޭނާ މަސައްކަތް ފަށާނީ ރަންވީރު ސިންގް ލީޑް ރޯލް ކުޅޭ އެކްޝަން ފިލްމެއް ހަދަން ކަމަށެވެ.