މި އަހަރުގެ ބޮޑު އީދު ވެސް މަރަދޫގައި ވަަރަށް ކުލަގަދަކޮށް ފާހަގަ ކުރަން އެ ރަށު "ހިޔައު" ޖަމިއްޔާ އިން ނިންމައި ތައްޔާރީތައް ވާން ފަށައިފި އެވެ.
އެ ޖަމިއްޔާގެ މީޑިއާ އޮފިޝަލް "އައްޑޫ ލައިވް" އަށް މިއަދު ބުނީ ބޮޑު އީދު ދުވަހާއި އީދާ އެކު އަންނަ ބަންދު ދުވަސްތަކަށް ބަހާލައިގެން މުޅި އައްޑު އަށް ހުޅުވާލައިގެން ތަފާތު ކުޅިވަރު މުބާރާތްތައް ވެސް ކުރިއަށް ގެންދާނެ ކަަމަަށެވެ. އޭގެ ތެރޭގައި މަސް ރޭހާއި ދެ ޖިންސްގެ މީހުންގެ ވާ ދެމުމުގެ މުބާރާތް ހިމެނެ އެވެ.
މީގެ އިތުރުން އީދު ދުވަހު ހަވީރު އާއިލޫ ހަވީރެއް ވެސް ތަފާތު ހަރަކާތްތަކާ އެކު ބާއްވާނެ އެވެ.
"ކުރިއަށް އޮތް ދެ ދުވަހެއްގެ ތެރޭގައި ކުޅިވަރުތަކުގައި ބައިވެރިވާން ފުރުސަތު ހުޅުވާލާނެ،" އޭނާ ބުންޏެވެ.
މި މުބާރާތްތަކުގައި ބައިވެރިވާ ފަރާތްތަކަށް ފައިސާގެ އިނާމް ވެސް ދޭ ގޮތަށް ވަނީ ހަމަޖައްސައިފަ އެވެ.
"ހިޔައު" ޖަމިއްޔާ އިން ބުނީ އީދު ނަމާދަށް ފަހު އެ ރަށު ކުޑަކުދިންގެ ޕާކްގައި ރަށުގެ ހުރިހާ ރައްޔިތުންނަށް ހާއްސަކޮށްގެން ބާއްވާ އީދު ސައި ވެސް އޮންނާނެ ކަމަށެވެ.
"އެހެންވެ ވަރަށް ގިނަ ބަޔަކު މީގައި ވެސް ބައިވެރިވާނެ ކަމަށް އުންމީދު ކުރަނީ. މީގެ ކުރިން ވެސް އަޅުގަނޑުމެން ބޭއްވި އީދު ހަރަކާތްތަކަށް އާންމުންގެ ފަރާތުން ވަރަށް ބޮޑު ތަރުހީބެއް ލިބިފައިވޭ،" އޮފިޝަލް ބުންޏެވެ.