ހުޅުމާލޭގައި ތަރައްގީކޮށް މިހާރު ހުޅުވަން ތައްޔާރުވަމުން އަންނަ ބިޔަ ޓާޝަރީ ހޮސްޕިޓަލް "ޓްރީ ޓޮޕް" ގައި ހުރި ވަޒީފާގެ ފުރުސަތުތަކާ ބެހޭ އޯޕަން ޑޭއެއް އައްޑޫގައި ބާއްވަން ނިންމައިފި އެވެ.
އެ ހޮސްޕިޓަލުން ބުނީ އެތަނުގައި ހުރި ވަޒީފާގެ ފުރުސަތުތައް އައްޑޫގެ އިތުރުން ފުވައްމުލަކު ރައްޔިތުންނަށް ވެސް ހުޅުވައިލާ ކަމަށެވެ. އެގޮތުން ޓްރީ ޓޮޕްގެ ޓީމެއް ދެ އަތޮޅަށް ޒިޔާރަތް ކުރަން ހަމަޖެހިފައިވާ ކަމަށެވެ.
އައްޑޫގައި އޯޕަން ޑޭ ބާއްވާނީ ސިޓީ ކައުންސިލް އިދާރާގައި މި މަހުގެ 14 އާއި 15 ވަނަ ދުވަހު އެވެ. އޯޕަން ޑޭ ކުރިއަށް ދާނީ ހެނދުނު 9:00-12:00 އަށް، މެންދުރު ފަހު 2:00-5:00 އަށް އަދި ރޭގަނޑު 8:00-10:00 އަށެވެ.
ޓްރީ ޓޮޕުން އޮޕަން ޑޭ އަށް ދާ އިރު ވަނަވަރާއި ސީވީތަކާ އެކު ދިއުމަށް އެދޭ ކަމަށެވެ. މަގާމުތަކުގެ ތެރޭގައި ކަސްޓަމާ ކެއާ، ސަޕޯޓް ސާވިސެސް، އެފްއެންޑްބީ، ކަލިނަރީ އަދި ނާސިން ހިމެނެ އެވެ.
ޗަމްޕާ ބްރާދާޒް އިން ތަރައްގީ ކުރި "ޓްރީ ޓޮޕް" ހޮސްޕިޓަލް މި މަހު ހުޅުވާނެ ކަމަށް ކުރިން އިއުލާންކޮށްފަ އެވެ.