ރާވެރިކަން ދަސްކޮށްދޭ ތަމްރީން ޕޮރޮގްރާމެއް އައްޑޫގައި ބާއްވަން ނިންމައި ބައިވެރިވުމުގެ ފުރުސަތު ހުޅުވާލައިފި އެވެ.
އެންވަޔަރަމެންޓް މިނިސްޓްރީން ބުނީ މި ތަމްރީނު ޕްރޮގްރާމަކީ އެ މިނިސްޓްރީން ހިންގާ ކްލައިމެޓް ޗޭންޖް އެޑަޕްޓޭޝަން ޕްރޮޖެކްޓް (ސީސީއޭޕީ) ގެ ދަށުން މޯލްޑިވްސް އޯތެންޓިކް ކްރާފްޓްސް ކޯޕަރޭޓިވް ސޮސައިޓީ (މެކްސް) އާއި ހަވާލުކޮށްގެން ހިންގާ ތަމްރީނު ޕްރޮގްރާމެއް ކަމަށެވެ.
ހިތަދޫގައި ކުރިއަށް ގެންދަން ހަމަޖެހިފައިވާ ރާވެރިކަން ދަސްކޮށް ދިނުމުގެ ޕްރޮގްރާމުގައި ރާވެރިކަން ދަސް ކުރުމަށް ޝަޢުގުވެރިކަން ހުރި އަދި އެ މަސައްކަތުން އާމްދަނީ ހޯދަން ބޭނުންވާ ފަރާތްތަކަށް އެކަންތައް ކުރާނެ ގޮތްތައް ކިޔައިދޭނެ ކަމަށް އެންވަޔަރަމަންޓް މިނިސްޓްރީން ބުންޏެވެ.
ހިލޭ ބައިވެރިވެވޭ މި ޕްރޮގްރާމުގައި ކިޔެވުމަށް ބޭނުންވާ އާލާތްތައް، ޕްރޮގްރާމް އިންތިޒާމު ކުރާ ފަރާތުން ފޯރުކޮށް ދޭނެ އެވެ.
ކޯހުގައި ގިނަވެގެން ބައިވެރިކުރުމަށް ނިންމާފައިވަނީ 10 މީހުންނެވެ.
އެންވަޔަރަމެންޓް މިނިސްޓްރީން ބުނީ ކޯހުގައި ބައިވެރިވާން ޝައުގުވެރިވާ މީހުން އެޕްލިކޭޝަން ފޯމް ފުރިހަމަ ކުރުމަށް ފަހު މި މަހުގެ 30 ވަނަ ދުވަހުގެ އައްޑޫ ޕްރޮޓެކްޓެޑް އޭރިޔާ މެނޭޖްމަންޓް ޔުނިޓް ސިޓީ ކައުންސިލް އިދާރާއާ ހަވާލު ކުރަން ޖެހޭ ކަމަށެވެ.