ވިދިވިދިގެން ދެ އެއްވުމެއްގައި ކުރީގެ ނާއިބު ރައީސް އަހުމަދު އަދީބުގެ ކުށްތަކާއިމެދު ރައީސް ޔާމީނު ވާހަކަފުޅު ދައްކަވައިފިއެވެ. އެންމެފަހުން ދެއްކެވި ވާހަކަފުޅުގައި ދައުލަތުން އަދީބު ނެންގެވި ފައިސާ ވަދެފައިވާ ތަންތަނާމެދުވެސް އަލިއަޅުވައިލައްވައިފިއެވެ. ވިދާޅުވިއެވެ. އެފައިސާއިން އަސުރުމާ އޮޅީގެ އެކި ކެމްޕޭނުތަކަށް ވެސް އޮތީ ހޭދަކުރެވިފައެވެ. އެ ފައިސާޔަކީ ހަލާލު ނޫން ފައިސާވީމާ ދެން ކުރާންޖެހޭ ކަންތަކެއްވެސް އެބަހުއްޓެވެ. މިކަންކަން ބަލައި ފިޔަވަޅު އަޅާން އެބަޖެހެއެވެ. ލަސްކޮށްގެންވެސް ވާކަށް ނެތެވެ. ކޮންމެއަކަސް މުޅި ވާހަކަފުޅުގެ މައިގަނޑަކީ އަހުމަދު އަދީބާއި އޭނާގެ ކޮރަޕްޝަނެވެ. ދައުލަތަށް ލިބުނު ގެއްލުމާއި ދެރައެވެ.
އަހުމަދު އަދީބުގެ ވާހަކަ މިހާރު މިގޮތަށް ރައީސް ޔާމީނު ދައްކަވަނީ ކީއްވެގެންކަން އަހަރުންނަކަށް ނޭނގެއެވެ. ދައުރު ނިމޭން އަހަރަކަށްވީމާ މިވާހަކަ ތިލަކުރައްވައިގެން ދެއްކެވުމުގެ ސިޔާސީ ހިކުމަތެއް އޮންނާނެއެވެ. އެއީ ކަށަވަރު ކަމެކެވެ. ކޮންމެއަކަސް ފައިސާގެ މިކަންކަން އަހުމަދު އަދީބު ހިންގަވާފައިވަނީ މިއަދަކު އިއްޔެއަކު ނޫނެވެ. އޭގެ ކުރީންނެވެ. އެންމެ ފުރަތަމަ ޕީޕީއެމްގެ ޖާގައެއްގައި ޑރ ވަހީދުގެ ދައުރުގައި ފަތުރުވެރިކަމާއި ބެހޭ ވަޒީރުކަމުގައި ހުންނަވައިގެންނެވެ. ދެން ރައީސް ޔާމީނުގެ މިދައުރުގެ ކުރީކޮޅުވެސް ހަމަ އެވުޒާރާގައި ހުންނަވައިގެންނެވެ. އޭގެފަހުން ރައީސް ޔާމީނުގެ ނާއިބަކަށް ހުންނަވައިގެންނެވެ. މިދައުރު ދެބައިވެގެން ދިޔައިރުވެސް އެކަން އޮތީ އެހެންނެވެ.
މިކަން މިހެން އޮތީމާ އަދީބު އެކުރެއްވި ކަމެއް ރައީސް ޔާމީނަށް އޭރު އެނގިވަޑައިގެންފައި ނެތުމަކީ ގަބޫލުކުރާން އަހުރެންނަށް ފަސޭހަކަމެއް ނޫނެވެ. ފަސޭހަނުވާ ވަރަށް ގިނަ ސަބަބުވެސް އެބަހުއްޓެވެ. ރޮކެޓް ސްޕީޑުގައި އަދީބަށް ކުރިއެރުން ދެއްވީ ރައީސް ޔާމީނެވެ. ޕީޕީއެމްގެ އެންމެހައި ކަންކަން ހިންގުމާއި ފައިސާގެ ކަންކަން ހަމަޖެއްސުމުގެ މަސްއޫލިއްޔަތު އޭނާޔާއި ހަވާލު ކުރެއްވީ ރައީސް ޔާމީނެވެ. އެކަމަށް މަގު ފަހިކޮށްދެއްވީ ރައީސް ޔާމީނެވެ. އެހައި ހިސާބަށް އަހުމަދު އަދީބަކީ އަލާއުއްދީނުގެ ވޮއްގަނޑު ގެންގުޅުނު މީހެއް ނޫނެވެ. އެކަން މުޅި ދިވެހިރާއްޖެއަށްވެސް އެނގެއެވެ. މިކަންކަމަކީ އަހުމަދު އަދީބު އަމިއްލަ އަމިއްލަޔަކަށް މަތިންބައިން ޖެހިގެން ހަވާލުވެގަތް ކަންކަމެއް ނޫނެވެ.
މިއަދު އެންމެންވެސް އެމީހަކަށް ތުހުމަތުގެ އިނގިލި އަމާޒުކުރާ އަދީބު އަދީބަކަށް ހެއްދެވީ ރައީސް ޔާމީނެވެ. މިވަރުގެ މަތިވެރި މަގާމުތަކާއި ބާރުތައް އަދީބަށް ދެއްވާނީ އޭނާގެ ހުރި ކެރިކުޅާދާނަ ކަމަކަށް ބައްލަވައިފައެވެ. މަގުމަތީން ހަމަ މީހަކު ގެންނަވައިފައި މިވަރުގެ މަގާމުތަކެއް ދެއްވައި އިތުބާރެެއް ނުކުރައްވާނެއެވެ. ރައީސް ޔާމީނު އަމިއްލަފުޅަށްވެސް ވިދާޅުވެފައިވެއެވެ. އަދީބަށް ފަސްސަތޭކަ ޕަސަންޓު އިތުބާރު ކުރައްވަމެވެ. އަދީބަކީ ވަރަށް ގާތް ބޭފުޅެކެވެ. މިވަރަށް އިތުބާރު ކުރައްވައިފައި މިވަރަށް ގާތުގައި ބެހެއްޓެވި މީހަކު އުޅޭނޫޅޭ ގޮތް ރައީސް ޔާމީނަށް އެނގިވަޑައިގެންފައި ނެތުމަކީ ދެން ވަރަށްވެސް އެހެންކަހަލަ ކަމެކެވެ. ރައީސް ޔާމީނަށް އެނގިވަޑައި ނުގެންނެވީއެވެ. ދެން މައްސަލައެއް ނެތެވެ. އެކަމަކު ރައީސް ޔާމީނަށް ހެޔޮއެދިވަޑައިގަންނަވާ އެހެން ބޭފުޅުންނަށް އަދީބުގެ ހަގީގަތް އެނގިވަޑައި ގަންނަވައެވެ. އެބޭފުޅުން މިވާހަކަތައް ރައީސް ޔާމީނާއި ހަމަޔަށްވެސް ގެންދެވިއެވެ.
ރައީސް ޔާމީނާއި ހަމަޔަށް މިވާހަކަ ގެންގޮސްދެއްވި އެއްބޭފުޅަކީ އަދާލަތު ޕާޓީގެ ރައީސް ޝައިޚް އިމްރާން އަބްދުﷲ އެވެ. އެއީ ތިޔަ މަގާމަށް ރައީސް ޔާމީނު ގެނެސްދެއްވުުމުގެ އެއްމޭސްތިރިޔެވެ. އޭރު ރައީސް ޔާމީނުގެ ކޯލިޝަނުގެ އެއްބައިވެރިޔެކެވެ. އިމްރާނު މިވާހަކަ ދެއްކެވީމާ ރައީސް ޔާމީނު ވިދާޅުވި ކަމަށް އިމްރާނު ވިދާޅުވަނީ ހެއްކާއި ގަރީނާ ގެންނާށެވެ. އަދި ތިޔަހެން ބުނާ ވާހަކަޔަކުން ކެއްކޭނެ ރިހަޔެއް ނޯންނާނެއެވެ. ރައީސް ޔާމީނަށް އެނގިވަޑައި ނުގަންނަވާކަމަށް ވަނީވިއްޔާ މިކަން އެބަހިނގައޭ ދެންނެވީމާ އެވަރުން ފުދޭ ނޫންތޯއެވެ. ހެއްކާއި ގަރީނާ ހޯދަން ރައީސް ޔާމީނު ހަވާލުކުރައްވަން ވާނީ ފުލުހުންނާ ނޫންތޯއެވެ. ފުލުހުން މިމަސައްކަތް ފަށާނީ ފިނިފެންމާ ލޯންޗުގައި އެހިނގިކަމެއް ހިނގުމަށްފަހު ނޫނެއްނޫންތޯއެވެ. އަދީބުގެ ވައްކަމުގެ ވާހަކަ ދައްކަވަން ވާނީ މިއަދަކު ނޫނެއްނޫންތޯއެވެ.
ކޮންމެއަކަސް އޭރު މިވާހަކަ ދެއްކެވި ބޭފުޅުންނަށް ލިބިވަޑައިގަތީ ކުރީން އެލިޔެވުނު ޖަވާބެވެ. ހެއްކާއި ގަރީނާ ލިބެންދެން އެބޭފުޅުން ހަނު ތިއްބަވައިފިއެވެ. ދެން މިޒާތުގެ ވާހަކަ އެކި މީހުން ދައްކާތީ ޕީޕީއެމުން ފެށީ އަހުމަދު އަދީބުގެ މަތިވެރިކަމާއި މާތްކަމުގެ ވާހަކަތަކެވެ. މިގޮތުން އަހުމަދު އަދީބަކީ ޚާލިދު ބިން ވަލީދު ފަދަ ބެއިކަލެކޭވެސް ކޮންމެވެސް ބޭފުޅަކު ވިދާޅުވެއްޖެއެވެ. ވައްކަމާއި ޚިޔާނާތަކީ އެފަދަ މަތިވެރިވެގެންވާ ބެއިކަލަކާ އެކަށީގެންވާ ކަމަކަށް ނުވާނެތާއެވެ. އެހެންނަމަވެސް އީމާނާއި އިއުތިގާދުގެ މަތީގައި ކެެރިގެން ހުންނަވައި އަބަދުވެސް ހައްގުބަސް ވިދާޅުވާ އިމްރާނުގެ ތުހުމަތުތައް އޭނާ ކުރެއް ނުކުރެއްވިއެވެ. އާއްމު އެއްވުންތަކުގައިވެސް އޭނާ މިވާހަކަ ދައްކަވައިފިއެވެ. ނަތީޖާއަކީ ކޮބައިތޯއެވެ. ޓެރަރިޒަމުގެ ދައުވާކުރެވި ދިގު މުއްދަތަކަށް އޭނާ ޖަލަށްލީއެވެ.
މިއަދު ރައީސް ޔާމީނު ތިޔަ ވިދާޅުވަނީ ކޮން ވާހަކަފުޅެއްތޯއެވެ. އަހުމަދު އަދީބާއި ބެހޭގޮތުން ތިޔަ ދައްކަވަނީ އޭރު އިމްރާނުމެންވެސް ދެއްކެވި ވާހަކަތަކެވެ. އައު ވާހަކަތަކެއް ނޫނެވެ. ވަގުތުފާއިތުވީފަހުން ވިޔަސް މިއަދު ރައީސް ޔާމީނަށް ލިބިވަޑައިގެންނެވި މައުލޫމާތު ހާމަކުރައްވަމުން ވަޑައިގަންނަވާއިރު ޝައިޚް އިމްރާނު މިނިވަންކުރަން ނުޖެހޭތޯއެވެ. އޭނާ ދައްކަވާންޖެހޭ ފައިސާއެއްވެސް އޮތީކީ ނޫނިއްޔާއެވެ. އޭރު ގޯސްކަމަށް ފެނުނު ވާހަކަ ރައީސް ޔާމީނު އަމިއްލަފުޅަށް މިހާރު ތިޔަ ވިދާޅުވަނީ ސައްހަކަމުގައެވެ. އެހެންވީމާ އިންސާފަކީ ވީހާވެސް އަވަހަށް ޝެއިޚް އިމްރާން އަބްދުﷲ މިނިވަންކުރުމެވެ. އަހުރެންނަށް މިކަން ފެންނަނީ މިގޮތަށެވެ.
އަދި އެއްވާހަކަ އިތުރުކޮށްލާނަމެވެ. އަހުމަދު އަދީބުގެ މައްޗަށް ފުލުފުލުން ދައުވާކުރެވެމުން ދާއިރު އެއްވެސް ނިޔާއެއްގައި އޭނާ ދައްކަވަން ޖެހޭ އަދަދެއް ނެތެވެ. އަދި ފައިސާ ދައްކަވައި ޚަލާސް ކުރެއްވުމަށް އަމުރު ކުރެވިފައިވާ ހުކުމެއްވެސް ނެތެވެ. އެހެންކަމަށްވާއިރު ރައީސް ޔާމީނު އެވިދާޅުވަނީ ކިހާވަރެއް ކޮންތާކަށް ދައްކަންޖެހޭ ވާހަކައެއްކަން މުޅިން ސައުފެއް ނޫނެވެ. ދެންފަހަރަކުން އޭގެ ތަފްސީލު ލިބިދާނެ ތޯއްޗެކެވެ.
މިވާހަކަތައް ލިޔާން ހުއްޓައި ޕީޕީއެމްގެ ނޫސްބަޔާނެއް ދެންމެއަކު ފެނިއްޖެއެވެ. އޭގައި އޮތެވެ. ރައީސް ޔާމީނު ދެއްކެވި ވާހަކަފުޅުގެ މާނަ އޮޅުވާލައިގެން ބަޔަކު މުޑުދާރު ވާހަކަތަކެއް އެބަފަތުރައެވެ. އެހެންވީމާ މީސްމީހުންގެ އަބުރާއި ކަރާމާތަށް އަރައިނުގަނެ މިވާހަކަތައް ހުއްޓައިލުމަށް ގޮވާލަމެވެ. މީގައި އަދި އޮތެވެ. ރައީސް ޔާމީނު އެދެއްކެވި ވާހަކަފުޅެއް ދެއްކެވީ 14 ޖުލައި 2014 ގައެވެ. އަޖައިބެއްފަހެ ނުވާނޭ ބާވައެވެ. އިއްޔެއަކީ 14 އޮގަސްޓް 2017 އެވެ. މިމޭރުމުން ރައީސް ޔާމީނު ވާހަކަ ދެއްކެވީ އިއްޔެއެވެ. އެހެންވީމާ ބަޔަކަށް ހިޖުރަ އޮޅޭނީ ދެން މިހާވަރަށެވެ. މީސްމީހުންގެ ހަނދާން އެހާ ބައްޔެއް ނޫނެވެ. މިހެންވުމަށް އަހުރެމެން ކިޔައި އުޅެނީ އަބަހައްދަ ވުމެވެ. މިޒާތުގެ ވާހަކަތަކަށްވެސް ކިޔަނީ އަބަހައްދަ ވާހަކަތަކެވެ.