ސަސްޕެންސް ތުރިލާ "ރޭސް 3" ގެ މަސައްކަތް ފަށަން ތައްޔާރުވަމުން އަންނަ އިރު، އެ ފިލްމުގެ އެއް ބަތަލާގެ ރޯލް ޑޭޒީ ޝާހަށް ހުށަހަޅައިފި އެވެ.
ސަލްމާން ހާން އަލަށް "ރޭސް 3" އިން ފެނިގެންދާ އިރު، މި ފިލްމުގެ ބަތަލާއިންގެ ލިސްޓްގައި "ރޭސް 2" ގައި ވެސް މުހިއްމު ރޯލެއް ކުޅުނު ޖެކޮލުން ފެނާންޑޭޒް ހިމެނެ އެވެ.
ސަލްމާން "ރޭސް 3" އިން ފެންނާނެކަން ޕްރޮޑިއުސަރު ރަމޭޝް ތައުރާނީ ކަށަވަރުކޮށް ދީފައިވާ އިރު، ޑޭޒީ ބުނީ އެ ފިލްމުގެ ވާހަކަ 2014 ގައި ތައުރާނީ އޭނާގެ ކައިރީގައި ވެސް ދައްކާފައިވާ ކަމަށެވެ.
"އެކަމާ ބެހޭ ގޮތުން އަދިވެސް މި އަންނަނީ ވާހަކަ ދައްކަމުން،" ސަލްމާނާ އެކު "ޖެއި ހޯ" ކުޅުނު ބަތަލާ ބުންޏެވެ.
ޑޭޒީ ބުނީ "ރޭސް 3" ވަރަށް އަވަހަށް ރަސްމީކޮށް ލޯންޗް ކުރަން ހަމަޖެހިފައިވާތީ ފިލްމާ ބެހޭ ގޮތުން އޭނާ އިތުރު އެއްވެސް ވާހަކައެއް ދައްކަން ބޭނުން ނުވާ ކަމަށެވެ.
ރިޕޯޓްތައް ބުނާ ގޮތުން "ރޭސް 3" ގެ ޑައިރެކްޓަރަކީ ރެމީ ޑި ސޫޒާ އެވެ.
"ރޭސް" ކުރީގެ ދެ ފިލްމް ޑައިރެކްޓްކޮށްފައި ވަނީ އައްބާސް-މަސްތާން އެވެ.
ދެހާސް އަށެއްގައި ރިލީޒް ކުރި "ރޭސް" ގައި ލީޑް ރޯލް ކުޅުނީ ސައިފް އަލީ ހާން، އަކްޝަޔޭ ކަންނާ، ބިޕާޝާ ބާސޫ އަދި ކެޓްރީނާ ކެއިފް އެވެ. މީގެ އިތުރުން އަނިލް ކަޕޫރާއި ސަމީރާ ރެޑީ ވެސް މުހިއްމު ރޯލްތަކުން ފެނިފައިވެ އެވެ.
ދެހާސް ތޭރައިގައި ރިލީޒް ކުރި "ރޭސް 2" ގެ ތަރިންނަކީ ސައިފް، ދީޕިކާ ޕަދްކޯން، ޖޯން އަބްރަހަމް އަދި ޖެކޮލިން އެވެ. އަދި އަނިލް އާއި އަމީޝާ ޕަޓޭލް ވެސް ހިމެނެ އެވެ.