ލޯކަލް ކައުންސިލްތައް އޮޑިޓް ކުރުމުގެ މަސައްކަތް އައުޓް ސޯސް ކުރަން ނިންމައި، ބިޑް ހުށައެޅުމުގެ ފުރުޞަތު އޮޑިޓަ ޖެނެރަލްގެ އޮފީހުން ހުޅުވާލައިފި އެވެ.
އެ އޮފީހުން ބުނީ ރަށު ކައުންސިލްތަކާއި އަތޮޅު އަދި ސިޓީ ކައުންސިލްތައް އޮޑިޓް ކުރުމަށް އައުޓް ސޯސްކުރަން ނިންމައި، އޮޑިޓް ފާރމްތަކުން ބިޑް ހުށައެޅުމުގެ ފުރުޞަތު އަންނަ މަހުގެ ސެޕްޓެމްބަރ 14 ވަނަ ދުވަހާ ހަމައަށް ހުޅުވާލާފައިވާ ކަމަށެވެ.
އެގޮތުން ކޮންމެ އޮޑިޓް ފާމަކަށް ވެސް ބިޑް ހުށައެޅޭނީ 43 ކައުންސިލެއް އޮޑިޓް ކުރުމަށެވެ. އޮޑިޓް އޮފީހުން ޖުމްލަ 129 ކައުންސިލެއް އޮޑިޓް ކުރުމަށް ހަމަޖެހިފައިވާ އިރު އޮޑިޓަ ޖެނެރަލްގެ އޮފީހުން މި މަސައްކަތް ބައްޓަންކޮށްފައިވަނީ ދިވެހި އޮޑިޓް ފާރމްތަކަށް ފުރުޞަތު ފަހިވާ ގޮތަށް ކަމަށެވެ.
ކައުންސިލްތައް އޮޑިޓް ކުރުން އައުޓްސޯސްކޮށްގެން ކުރިއަށް ގެންދަން ނިންމާފައިވާ އިރު، އޮޑިޓް ކުރުމަށް ދާ ހުރިހާ ޚަރަދެއް ބަލަހައްޓަން ޖެހޭނީ ބިޑް ކާމިޔާބު ކުރާ އޮޑިޓް ފާރމްތަކުންނެވެ.
އެގޮތުން ކޮންމެ ކައުންސިލެއް އޮޑިޓް ކުރުމަށް ހުށައެޅޭނެ އެންމެ މަތީ އަގަކީ 21،620ރ. ކަމަށް އޮޑިޓަރ ޖެނެރަލްގެ އޮފީހުން ވަނީ ކަނޑައަޅައިފައެވެ. އަދި އޮޑިޓްގެ އެންމެހައި ކަންކަން އަންނަ ޑިސެމްބަރު މަހުގެ ނިޔަލަށް ނިންމައި އޮޑިޓް ރިޕޯޓް ފައިނަލް ކުރަން ޖެހެ އެވެ.