އިސްތަށިގަނޑުގައި ކުލަ ޖައްސަން ބޭނުންހެއްޔެވެ؟ އެހެންކަމަށް ވާނަމަ ސްޓައިލިސްޓާއި އެކު އެޕޮއިންޓްމެންޓް ހެދުމުގެ ކުރިން ތިރީގައި މިވާ ކަންތައްތަކާއިމެދު ވިސްނާލާށެވެ!
1. 'ކަލަރ ޕްރޮޓެކްޓް' ޝޭމްޕޫ އާއި ކޮންޑިޝަނަރ ބޭނުންކުރުން
އިސްތަށިގަނޑުގައި ކުލަ ޖެއްސުމަށްފަހު ބޭނުންކުރަންވީ ކޮންކަހަލަ ޝޭމްޕޫއަކާއި ކޮންޑިޝަނަރއެއްތޯ އާއިމެދު ސްޓައިލިސްޓާއި ސުވާލު ކުރުމަކީ ވަރަށް މުހިންމު ކަމެކެވެ. ރަނގަޅު ޝޭމްޕޫއަކާއި ކޮންޑިޝަނަރ އެއް ބޭނުން ނުކޮށްފިނަމަ، އިސްތަށިގަނޑުގެ ކުލަ ވަރަށް އަވަހަށް ފޭދި، އިސްތަށިގަނޑަށް ގިނަ ގެއްލުންތަކެއް ލިބޭނެ އެވެ.
2. އިސްތަށިގަނޑުގައި ޖައްސާނެ ކުލައެއް ހޮވުން
އިސްތަށިގަނޑުގައި ކުލަ ޖެއްސުމުގެ ކުރިން އެކި ފަހަރު މަތިން މާގިނައިން ބްލީޗް ކުރުމަކީ އިސްތަށިގަނޑަށް ގެއްލުން ލިއްބައިދޭ ކަމެކެވެ. އެހެންކަމުން އިސްތަށިގަނޑުގައި ޖައްސަން ބޭނުން ވަނީ ކޮން ކުލައެއް ކަމާއި މެދު ފުރިހަމަ ޔަޤީންކަން އޮންނަން ވާނެ އެވެ.
3. އިރުގެ ދޯދިތަކުން އިސްތަށިގަނޑު ރައްކާތެރިކުރުން
އިސްތަށިގަނޑުގެ ރީތިކަމާއި އޮމާންކަން ގެއްލުވާލަން ބޭނުން ނޫންނަމަ، އިރުގެ ބާރުގަދަ ދޯދިތަކުން އިސްތަށިގަނޑު ރައްކާތެރި ކުރުމަކީ މުހިންމު ކަމެކެވެ. މާބޮޑަށް އިސްތަށިގަނޑުގައި ކުލަ ޖައްސައިގެން އަވީގައި އުޅުމަކީ އިސްތަށިގަނޑު ޑީހައިޓްރޭޓްކޮށް، ރީތިކަން ގެއްލުވައިދޭ ކަމެކެވެ.
4. ކުލަ ޖެއްސުމަށްފަހު ވަގުތުން އިސްތަށިގަނޑުގައި ތެޔޮލުން
އިސްތަށިގަނޑުގައި ޖައްސާ ކުލަތަކަކީ އޭގައި އިސްތަށިގަނޑަށް ގެއްލުން ލިއްބައިދޭ ނުރައްކާތެރި ކެމިކަލްތައް ހިމެނިގެންވާ އެއްޗެކެވެ. އެހެންކަމުން އިސްތަށިގަނޑު ނަރިޝް ކުރުމަށްޓަކައި ކުލަ ޖެއްސުމަށްފަހު ވީހާވެސް އަވަހަކަށް އިސްތަށިގަނޑުގައި ތެޔޮ ލުމަކީ ވަރަށް މުހިންމު ކަމެކެވެ.
5. އިސްތަށިގަނޑުގައި ކުލަ ޖައްސަންވީ މިންވަރު
ކޮންމެ މީހެއްގެ އިސްތަށިގަނޑު ވެސް ތަފާތުވާނެ އެވެ. އެހެންކަމުން ސެލޫންގެ ހެއަރ ސްޓައިލިސްޓް ގާތު އިސްތަށިގަނޑުގައި ކުލަ ޖެއްސުން އެންމެ ރަނގަޅީ ކިތައް ފަހަރުތޯ ސުވާލުކޮށް، އެކަން އޮޅުން ފިލުވާށެވެ. މާގިނައިން ކުލަ ޖެއްސުމަކީ ވެސް ރަނގަޅު ކަމެއް ނޫނެވެ.