ފޭސްބުކްގެ ކޯ-ފައުންޑަރ މާކް ޒަކަބާގް އާއި އޭނާގެ އަންހެނުން ޕްރިސިލާ ޗެން އަށް އަންހެން ކުއްޖަކު ލިބިއްޖެ އެވެ.
ޒަކަބާގް ވަނީ އެދެމަފިރިންގެ ދެވަނަ ދަރިފުޅު ކަމަށްވާ "އޮގަސްޓް" އުފަންވި ކަމުގެ އުފާވެރި ޚަބަރު ހޯމަ ދުވަހު ފޭސްބުކް މެދުވެރިކޮށް އިއުލާން ކޮށްފަ އެވެ.
އެގޮތުން އޮގަސްޓް އަށް ޚާއްސަކޮށް ފޭސްބުކްގައި ހިއްސާކުރި ސިޓީއެއް ގައި ޒަކަބާގް ބުނެފައި ވަނީ އޭނާ ހުރީ ދަރިފުޅާއި އެކު ކުރިއަސޤ އޮތް ދުވަސްތައް ހޭދަކުރުމަށް ކެތްމަދުވެފައި ކަމަށާއި، އެ ދަރިފުޅުގެ ޅައިރުގެ ދުވަސްތައް އުފާވެރިވާނެ ކަމަށް އުއްމީދު ކުރާ ކަމަށެވެ.
އެ ސިޓީ އާއި އެކު ޒަކަބާގް ވަނީ އޭނާގެ ކުޑަ ކުޑަ އާއިލާގެ ފޮޓޯއެއްވެސް ހިއްސާކޮށްފަ އެވެ. އެ ފޮޓޯގައި އޭނާ އާއި އޭނާގެ އަންހެނުންގެ އިތުރުން ފުރަތަމަ ދަރިފުޅު މެކްސް އާއި އަލަށް ލިބުނު ދަރިފުޅު އޮގަސްޓް ހިމެނެއެވެ.
ޒަކަބާގް އާއި ޕްރިސިލާ ޗޭން ކައިވެނި ކޮށްފައި ވަނީ 2012 ވަނަ އަހަރު އެވެ. އަދި އެދެމަފިރިންގެ ފުރަތަމަ ދަރިފުޅު ކަމަށްވާ މެކްސް ލިބިފައި ވަނީ 2015 އަހަރުގެ ޑިސެމްބަރު މަހުގެ ތެރޭގައެވެ.
މެކްސް އުފަންވުމުގެ ޚަބަރު އިއުލާން ކުރުމުގެ ގޮތުން ވެސް ޒަކަބާގް ވަނީ ހަމަ މިފަދަ ސިޓީއެއް ލިޔެ ޕޯސްޓް ކޮށްފައެވެ. އަދި އެކަމުގެ އުފަލުގައި ޒަކަބާގް ވަނީ އޭނާ އާއި ޕްރިސިލާ އަށް ފޭސްބުކުން ލިބޭ ހިއްސާގެ 99 އިންސައްތަ 'ޗޭން ޒަކަބާގް އިނީޝިއޭޓިވް' ހަދިޔާ ކުރާނެ ކަމަށް ބުނެފައެވެ.