ކުރީގެ ރައީސް މުހައްމަދު ނަޝީދުގެ ވެރިކަމުގައި ދިވެހިރާއްޖެ ކާބަން ނިއުޓްރަލް ޤައުމަކަށް ހެއްދެވުމަށް ފެއްޓެވި މަސައްކަތަށް އެއްބާރުލާ، އެކަން ތަންފީޒު ކުރުމަށް ބާރުއެޅުމުގެ ގޮތުން އައްޑޫ ސިޓީ އަކީ ކާބަން ނިއުޓްރަލް ސިޓީއަކަށް ހެދުމަށް އައްޑޫ ސިޓީ ކައުންސިލުން މަސައްކަތްތަކެއް ކުރެ އެވެ.
އެހެންކަމުން އައްޑޫ ސިޓީ %100 ކާބަން ނިއުޓްރަލް ކުރުމުގެ ވާހަކަ އަކީ މިފަހަކަށް އައިސް އައްޑޫގެ ރައްޔިތުންނަށް އިވެމުންދާ އެންމެ ބޮޑު އެއް ވާހަކަ އެވެ.
ދިވެހި ރާއްޖޭގެ ފުރަތަމަ ކާބަން ނިއުޓްރަލް ސިޓީ އަކަށް އައްޑޫ ސިޓީ ވެގެންދާތަން ދުށުމަކީ އައްޑޫގެ ގިނަ ރައްޔިތުން ތަކެއްގެ ހުވަފެނެކެވެ.
އައްޑޫ ސިޓީ ކާބަން ނިއުޓްރަލްސިޓީ އަކަށް ހެދުމުގެ ވާހަކަ ރަސްމީ ސިފައެއްގައި އިވިގެން ދިޔައީ ދާދި ފަހުން އީސީސީގައި ބޭއްވިގެން ދިޔަ "އައި ހޭވް އަ ޑްރީމް" އިވެންޓް ތެރެއިންނެވެ. އައްޑޫ ސިޓީގެ މޭޔަރު ޢަބްދުﷲ ސޯދިޤް (ސޯބެ) ވަނީ 2020 ވަނަ އަހަރުގެ ނިޔަލަށް މުޅި ސިޓީ ކާބަން ނިއުޓްރަލް ކުރެވޭނެ ކަމަށް އެ ބޭފުޅާ އަށް ގަބޫލުފުޅު ކުރެއްވޭ ކަމަށް ވިދާޅުވެފަ އެވެ.
ތިރީސް ހާހަށް ވުރެ ގިނަ މީހުން ރެޖިސްޓްރީ ކުރެވި ގިނަ ބަޔަކު ދިރިއުޅޭ އައްޑޫ ކާބަން ނިއުޓްރަލް ކުރުމަށްޓަކައި މިހާތަނަށް ސިޓީ ކައުންސިލުން ވަނީ ގިނަ މަސައްކަތްތަކެއް ކުރައްވާފަ އެވެ. އެގޮތުން ތަފާތު އިންވެސްޓަރުންނާއި ވާހަކަތައް ދެކެވިފައިވާ ކަމަށް ސިޓީ ކައުންސިލުން ހާމަކޮށްފައިވެ އެވެ.
ސިޓީ ކައުންސިލުގެ ޓީމެއް އެންމެ ފަހުން ބެންކޮކަށް ކުރެއްވި ދަތުރުފުޅުގައި ވެސް އައްޑޫ މަގުތަކުގެ ލައިޓްތައް އިރުގެ ހަކަތައިން ދިއްލޭ ލައިޓް ތަކަށް ބަދަލު ކުރުމުގެ މަޝްވަރާތައް ކުރުމުގެ އިތުރަށް ކުނިން ހަކަތަ އުފައްދާ ނިޒާމެއް އައްޑޫގައި ގާއިމް ކޮށްދޭނެ ބަޔަކުވެ ސް ހޯދިފައިވާ ކަމަށް މަޢުލޫމާތު ލިބިފައިވެ އެވެ.
ކޮންމެއަކަސް މިއިން އެއްކަމެއް ވެސް މިއަދާ ހަމައަށް ވެފައި ނެތްކަމީ ފެންނަން އޮތް ހަގީގަތެކެވެ. އެހެންކަމުން ގިނަ ބަޔަކަށް ހީވެފައި އޮންނަނީ މިފަދަ ހުވަފެންތައް ކައުންސިލުން ދައްކަނީ ރައްޔިތުންނަށް އޮޅުވާލާ ވާ ވެއްދުމުގެ ނިޔަތުގައި ކަމަށެވެ.
އެހެންކަމުން މިކަމުގެ ހަގީގަތް ހޯދާލުމަށް މޭޔަރ އަރިހުގައި ސުވާލު ދެންނެވީމެވެ. ޖަވާބުގައި ވިދާޅުވީ އައްޑޫ ސިޓީ ކާބަން ނިއުޓްރަލް ކުރުމަށް މިކުރާ މަސައްކަތުގައި އޮތް އެންމެބޮޑު ހުރަހަކީ ސަދަން ޔުޓިލިޓީޒް ލިމިޓެޑް (އެސްޔޫއެލް) ކަމެވެ. ސިޓީގެ އިންޖީނުގެތަކާއި ކަރަންޓު ދިނުމުގެ ޚިދުމަތަކީ އެސްޔޫއެލްގެ ދަށުގައި ހުރި ކަންކަން ކަމަށް ވެފައި އެބޭފުޅުންގެ އެއްބާރުލުން ނުލިބުމުގެ ނަތީޖާ އަކީ މިއަދު އައްޑޫ ސިޓީ ކާބަން ނިއުޓްރަލް ކުރުމަށް ކުރަމުންދާ މަސައްކަތްތައް މަޑު ޖެހިފައި ވުމެވެ.
މޭޔަރު އިތުރަށް ވިދާޅުވީ ބޭރުގެ އެތައް ކުންފުނިތަކަކުން ގިނަ ޕްރޮޖެކްޓްތަކެއް އައްޑޫގައި ހިންގަން ބޭނުން ކަމަށާއި ނަމަވެސް ކަރަންޓް ފޯރުކޮށް ދިނުމުގެ ޚިދުމަތަކީ އެސްޔޫއެލްގެ ހިދުމަތެއްގެ ގޮތުގައި އޮތުމުގެ ސަބަބުން ކައުންސިލަށް އެ ކުންފުނިތަކާ ގުޅިގެން މިފަދަ ޕްރޮޖެކްޓްތައް ހިންގަން ގިނަ ދަތިތަކެއް ހުރި ކަމަށެވެ.
އެހެންކަމުން މި ސިޓީ ކާބަން ނިއުޓްރަލް ކުރުމުގެ ޕްރޮޖެކްޓްތައް ކުރިއަށް ގެންދެވެން އޮތީ ކަރަންޓް ދިނުމުގެ ޚިދުމަތް ކައުންސިލްގެ ދަށަށް އައިސްގެން ކަމަށް މޭޔާރ ވިދާޅުވި އެވެ.
ކޮންމެއަކަސް ބޭނުމީ ގިނަ ކުންފުނިތަކެއް ހުރެ ގިނަ ބަޔަކަށް ވަޒީފާތައް ލިބުމެއް ނޫނެވެ. އައްޑޫ ސިޓީއަށް ބޭނުމީ ސިޓީ ތަރައްޤީވުމެވެ. އިއާދަ ކުރުވަނިވި ހަކަތަ ބޭނުންކުރާ ފުރަތަމަ ސިޓީ އަކީ އައްޑޫ ސިޓީއަށް ވުމަކީ އައްޑޫ ރައްޔިތުންގެ އުއްމީދެވެ.
އެހެންކަމުން އައްޑޫ ރައްޔިތުންގެ ހުވަފެން ހަޤީޤަތަކަށް ހެދުމަށްޓަކައި ސިޓީ ކައުންސިލުން އައްޑޫގެ ކަރަންޓްގެ ޚިދުމަތް ދޭން ފަށާ ދުވަހަކީ އައްޑޫ ރައްޔިތުން ދެކެން ބޭނުންވާ ދުވަހެކެވެ.