ސްކްރިޕްޓް ޑިމާންޑް ކުރާ ނަމަ އޭނާ އަށް ވުރެ ޒުވާން އެކްޓަރަކާ އެކު މަސައްކަތް ކުރަން އެއްވެސް މައްސަލައެއް ނެތް ކަމަށް ކާޖޮލް ބުނެފި އެވެ.
ދާދި ފަހުން ރިލީޒް ކުރި ތަމަޅަ ފިލްމް "ވީއައިޕީ 2" ގައި ވެސް މުހިއްމު ރޯލެއް ކުޅެފައިވާ ބަތަލާ ބުނީ މިހާރު ވަރަށް ތަފާތު ވައްތަރުގެ ފިލްމްތައް ޑައިރެކްޓަރުން ގެނެސް ދޭ ކަމަށެވެ. އެހެންވެ އޭނާ އަށް ހުށަހަޅާ ސްކްރިޕްޓަކާ ގަޔާވާ އިރު، އޭގައި ޅަ އެކްޓަރަކާ އެކު މަސައްކަތް ކުރަން ޖެހުމަކީ އެއްވެސް މައްސަލައެއް ނޫން ކަމަށް ކާމިޔާބު ގިނަ ފިލްމްތަކެއް ކުޅެފައިވާ ބަތަލާ ބުންޏެވެ.
"އެކަމަކު އެކަން ކުރާނީ ޝަރުތެއްގެ މަތިން،" އެކްޓަރު އަޖޭ ދޭވްގަންއާ ކައިވެނިކޮށް ދެ ދަރިން ލިބިފައިވާ ކާޖޮލް ބުންޏެވެ.
އޭނާ ބުނީ ޅަ އެކްޓަރާ އެކު މަސައްކަތް ކުރާނީ އެ އެކްޓަރަކީ "ކުޑަ ކުއްޖަކާ ވައްތަރު ނޫން، ފިރިހެންވަންތަ އެކްޓަރެއް ނަމަ" ކަމަށެވެ.
"މިހާރުގެ ޖެނެރޭޝަނަށް ބަލާ އިރު ވަރަށް ހުނަރުވެރި ޒުވާން އެކްޓަރުން އެބަތިބި. އެކަމަކު ބޭނުމެއް ނޫން އެއްވެސް މީހެއްގެ ނަން ބުނާކަށް." ކާޖޮލް، 43، ބުންޏެވެ.