ފޭދޫގެ ކޮންސްޓްރަކްޝަން ކުންފުންޏެއްގައި މަސައްކަތް ކުރާ ބިދޭސީންތަކެއް ފިލާފައިވާތީ އެ މީހުން ހޯދައިދޭ ބަޔަކަށް އެ ކުންފުނިން ފައިސާގެ އިނާމެއް ދޭ ގޮތަށް ނިންމައިފަ އެވެ.
އެ ކުންފުނީގެ ފަރާތުން ވާހަކަ ދެއްކި އިބްރާހީމް ޝިޔާމް ބުނީ އެކި ދުވަސްމަތިން ކުންފުނީގައި މަސައްކަތް ކުރާ ފަސް ބިދޭސީން ފިލާފައިވާ ކަމަށާއި މީގެ ސަބަބުން މަސައްކަތްތަކަށް ވަރަށް ބޮޑަށް ބުރޫ އަރާފައިވާ ކަމަށެވެ.
ފިލި ބިދޭސީންގެ ފޮޓޯ ވެސް ކުންފުނިން ވަނީ އާންމުކޮށްފަ އެވެ. އެ މީހުންނާ ބެހޭ މައުލޫމާތެއް ލިބިފައިވާ ނަމަ 9807774 އަށް ގުޅައި ހިއްސާ ކުރަން ކުންފުނިން އެދެ އެވެ.
އޭނާ ބުނީ މި މައްސަލަ ފުލުހުންނަށް ވެސް ރިޕޯޓްކޮށްފައިވާ ކަމަށާއި ފިލި ބިދޭސީން މިހާރު ތިބީ ހުޅުމާލޭގައި ކަމަށް މައުލޫމާތު ލިބޭ ކަމަށެވެ.
"އެހެންވެ އެ މީހުން ހޯދައިދޭ ބަޔަކަށް ފައިސާގެ ރަނގަޅު އިނާމެއް އަޅުގަނޑުމެން ދޭނަން،" ޝިޔާމް ބުންޏެވެ.
އޭނާ ބުނީ ބިދޭސީންތަކެއް ފިލައިގެން ދިޔައީ އެ މީހުންނަށް ބޮޑު މުސާރަ ދޭނެ ކަމަށް ބުނެ، ގަވައިދާ ހިލާފަށް މަސައްކަތް ކުރުވާ ކުންފުނިތަކެއްގެ ބަހަށް ހެއްލިގެން ކަމަށެވެ.
"އެ މީހުން ހޯދަން އުޅެގެން އަޅުގަނޑުމެން އަތުން މިހާތަނަށް ވެސް ވެސް ވަރަށް ގިނަ ފައިސާތަކެއް ހަރަދުވެއްޖެ. ހުޅުމީދޫގައި އެ މީހުން ތިބި ކަމަށް މައުލޫމާތު ލިބިގެން އެ ރަށް ވެސް ބެލިއްޖެ. އަދި ފުވައްމުލަކުގައި ތިބި ކަމަށް ބުނާތީ އެ ރަށް ވެސް ބެލި ފަހުން މިހާރު މައުލޫމާތު ލިބެނީ ހުޅުމާލޭގައި އެ ފަސް މީހުން މަސައްކަތް ކުރަމުންދާ ކަމަށް،" ޝިޔާމް ބުންޏެވެ.
"އަޅުގަނޑުމެން އެ މީހުންނާ ދޭތެރޭ ވަރަށް ރަނގަޅަށް ކަންތައްތައް ކޮށްދެމުން ދަނިކޮށް ފިލީ. އެހެންވެ ބޭނުން ވަނީ އެ މީހުން ހޯދައި، ރާއްޖޭން ޑިޕޯޓް ކުރެވޭނެ ގޮތެއް ހަދަން،" ޝިޔާމް ބުންޏެވެ.
އޭނާ ބުނީ ބިދޭސީން ލައްވައި ގަވައިދާ ހިލާފަށް މަސައްކަތް ކުރުވާ ކުންފުނިތައް އުޅޭތީ ގަވައިދާއި ގާނޫނާ އެއްގޮތަށް މަސައްކަތް ކުރާ ކުންފުނިތަކަށް ވަރަށް ބޮޑެތި ދަތިތަކާއި ހުރަސްތަކާ ކުރިމަތިލާން ޖެހިފައިވާ ކަމަށެވެ.
އެހެންވެ އެފަދ ކުންފުނިތަކާ މެދު ގާނޫނީ ފިޔަވަޅު އަޅަން ވެސް ޖެހޭ ކަމަށް ޝިޔާމް ބުންޏެވެ.
އޭނާ ބުނީ ޕްރޮޖެކްޓްތައް ނަގައިގެން މަސައްކަތް ކުރަމުން ދަނިކޮށް، ބިދޭސީން ފިލުމަކީ ފޫނުބެއްދޭ ވަރުގެ ބޮޑު ގެއްލުމެއް ކަމަށެވެ.