ހުޅުމީދޫގައި މިހާރު ކުރިއަށް ގެންދާ ނަރުދަމާ ނިޒާމް ގާއިމު ކުރުމުގެ މަސައްކަތުގެ ތެރެއިން ހޮޅި ވަޅުލުމުގެ މަސައްކަތް ފަށައިފި އެވެ.
ހުޅުމީދޫގެ ނަރުދަމާގެ މަސައްކަތް ރަސްމީކޮށް އިފުތިތާހު ކުރީ މިދިޔަ އެޕްރީލް މަހުގެ 28 ގަ އެވެ. މި މަސައްކަތް ހަވާލުކޮށްފައި ވަނީ ސްރީ ލަންކާގެ ސިއެރާ ކުންފުންޏާ އެވެ.
ހޮޅި ވަޅުލުމުގެ މަސައްކަތް ވަރަށް ބާރަށް މިހާރު އަންނަނީ ކުރަމުންނެވެ. އެހެން ނަމަވެސް މޫސުން ގޯސްވުމުގެ ސަބަބުން ދަތިތަކެއް ދިމާވެފައިވެ އެވެ. ހޮޅިވަލުމުގެ މަސައްކަތް ކުރިއަށްދާ އިރު ޖަންކްޝަންތައް ވެސް ތައްޔާރުކޮށް އެ ތަކެތި ބެހެއްޓުމުގެ މަސައްކަތް ވެސް އަންނަނީ ކުރަމުންނެވެ.
އޯޕެކް ފަންޑުގެ އެހީގައި ކުރިއަށް ގެންދާ މިމަޝްރޫޢުގެ މަސައްކަތް އަންނަ އަހަރުގެ މާޗް މަހުގެ ނިޔަލަށް ނިންމަން ޖެހެ އެވެ.
ނަރުދަމާގެ މަސައްކަތް ކުރިއަށްދާ އިރު ޖުލައި މަހުގެ ތެރޭގައި ވަނީ ހިދުމަތަށް އެދުމުގެ ފުރުސަތު ވެސް އާންމުކޮށް ހުޅުވާލައިފަ އެވެ.