ރޮހިންޔާ ދަރިކޮޅުގެ މުސްލިމުންނާ ދެކޮޅަށް ލާއިންސާނީ ޖަރީމާތައް ހިންގަމުންދާ މިޔަންމާ ސަރުކާރާ އެކު ރާއްޖޭން އިއްޔެ ވިޔަފާތި ގުޅުން ކަނޑާލާފައި ވަނިކޮށް، އެ ގައުމުގެ ސިއްހަތާ ބެހޭ ވަޒީރު ޑރ. މަޔަންޓް ހުވައި ރާއްޖެ ވަޑައިގަތުމަށް ހަމަޖެއްސި ދަތުރު ކެންސަލްކޮށްފި އެވެ.
އެނގިފައިވާ ގޮތުގައި ޑރ.މަޔަންޓް ރާއްޖެ ވަޑައިގަތުމަށް ކުރިން ހަމަޖެހިފައި އޮތީ މާދަމާ ރެ އެވެ. އެހެން ނަމަވެސް އެ ދަތުރު މިހާރު ވަނީ ކެންސަލްކޮށްފަ އެވެ.
އޭނާ ރާއްޖެ ވަޑައިގަންނަވަން ނިންމެވީ ދުނިޔޭގެ ސިއްހަތު ޖަމިއްޔާ (ޑަބްލިއުއެޗްއޯ) އިން މި މަހުގެ 6 ވަނަ ދުވަހު ރާއްޖޭގައި ބާއްވާ ކޮމެޓީ ބައްދަލުވުމުގައި ބައިވެރިވެވަޑައިގަތުމަށެވެ.