މިޔަންމާގެ މުސްލިމު ރޮހިންޖާ ދަރިކޮޅު ރައްޔިތުންނަށް ކުރިމަތިވެފައިވާ ލާއިންސާނީ އަނިޔާތަކުން އެ މީހުން ސަލާމަތްކޮށް، ހިމާޔަތް ހޯދައި ދިނުމަށް ގޮވާލައި އައްޑޫ ސިޓީ ކައުންސިލުން ގަރާރެއް ފާސްކޮށްފި އެވެ.
"އިސްލާމީ މުޅި އުއްމަތަށް ކުރިމަތިވެފައިވާ އެންމެ ބޮޑު ހިތްދަތި ކަމަކަށް މިއަދު ވެފައި މި ވަނީ "މިޔަންމާގެ ރޮހިންގާ ދަރިކޮޅު" މުސްލިމުންގެ ޙައްޤުތައް ނަގާލާ، އެ ޤައުމުގައި ދެމުން ގެންދާ ލާއިންސާނީ ޢަމަލުތަކެވެ. މުސްލިމުން ޤަތުލުކޮށް ގުނަވަންތައް ބުރިކޮށްލާ އަންދާލާ، އެބައިމީހުން އަމިއްލައަށް ވީޑިއޯ ނަގާ މުޅި ދުނިޔެއަށް ދަނީ ފަތުރަމުންނެވެ." ކައުންސިލްގެ ގަރާރުގައި ބުންޏެވެ.
އެ ގަރާރުގައި އަދި ބުނީ އިންސާނީ ޙައްޤުތައް ޙިމާޔަތް ކުރުމަށް ވަކާލާތު ކުރައްވައި، ނޯބަލް ޕީސް ޕްރައިޒް ލިބިވަޑައިގެންފައިވާ ވެރިޔެއްގެ ގޮތުގައި އެ ޤައުމުގެ ލީޑަރު އަން ސަން ސޫޗީ ހުންނަވައި، ރޮހިންގާ މުސްލިމުންނާއި ދޭތެރޭ މިފަދަ ލާއިންސާނީ ޢަމަލުތައް ހިންގުމަކީ އައްޑޫ ސިޓީ ކައުންސިލުން ނިހާޔަތަށް ހިތާމަ ކުރާ ކަމެއް ކަމަށެވެ.
"މިކަން އައްޑޫ ސިޓީ ކައުންސިލުން އެންމެ ހަރުކަށި ޢިބާރާތުން ކުއްވެރި ކުރަމެވެ. މިލިއަނަކަށްވުރެ ގިނަ މުސްލިމުން ހިމެނޭ އާބާދީއެއްގައި، މިފަދަ ބޮޑު ޤަތުލު ޢާއްމެއް ހިންގާ އެތައް ހާސް މުސްލިމުން އެކަމުގައި ނެތި ފަނާވެ ދިއުމަކީ، އައްޑޫ ރައްޔިތުން ވަރަށް ކަންބޮޑުވެ ހިތާމަކުރާ ކަމެކެވެ. މިފަދަ ލާއިންސާނީ އަނިޔާވެރި ޢަމަލުތައް މިހާރުން މިހާރަށް ހުއްޓާލުމަށް މިޔަންމާގެ ވެރިންނަށް ހަރު އަޑުން ގޮވާލަމެވެ. އަދި "މިޔަންމާގެ ރޮހިންގާ ދަރިކޮޅު" މުސްލިމުންގެ އިންސާނީ ޙައްޤުތައް ޙިމާޔަތްކޮށް ދިނުމަށްޓަކައި އަވަސް ފިޔަވަޅުތަކެއް އަޅުއްވައި ދެއްވުމަށް އދ. އަށާއި ދުނިޔޭގެ އެންމެހާ ޤައުމުތަކަށް އިލްތިމާސް ކުރަމެވެ." ގަރާރުގައިވެ އެވެ.
އަދި މާތް ﷲ "މިޔަންމާގެ ރޮހިންގާ ދަރިކޮޅު" މުސްލިމުންނަށް ދިމާވެފައިވާ މި ނިކަމެތި ޙާލުން އެ ޤައުމުގެ މުސްލިމުން ސަލާމަތް ކުރާއްވާތޯ ގަރާރުގައި ދުއާކާކޮށްފައިވެ އެވެ.
"އެބައި މީހުންގެ އިންސާނީ ޙައްޤުތައް ސަލާމަތް ކުރައްވާނެ ގޮތްތައް މިންވަރު ކުރައްވާށިއެވެ. ދުޝްމަނުންގެ ހިތްތައް ފިނިކުރައްވައި ހެޔޮ ވިސްނުންދެއްވާށިއެވެ. އާމީން." ގަރާރުގައިވެ އެވެ.
ކައުންސިލުން ބުނީ ތިން ވަނަ ދައުރުގެ 14 ވަނަ މަޖިލީހުގައި ބައިވެރިވެ، މި ޤަރާރުގައި ޤާނޫނީ ސިއްކަ އޮބައި ސޮއިކޮށް، ޤަރާރު ނެރޭ ކަމަށެވެ.
"އަޅުގަނޑުމެން މި ގޮވާލަނީ "މިޔަންމާގެ ރޮހިންގާ ދަރިކޮޅު" މުސްލިމުންނަށް ދިމާވެފައިވާ މި ނިކަމެތި ޙާލުން އެ ޤައުމުގެ މުސްލިމުން ސަލާމަތް ކޮށް، "މިޔަންމާގެ ރޮހިންގާ ދަރިކޮޅު" މުސްލިމުންނަށް ޙިމާޔަތް ހޯދައި ދިނުމަށެވެ."