ދައުލަތުގެ ބަޖެޓް ފާސްކުރުމަށް މަޖިލީހުގެ ތެރެއިން މަސައްކަތް ކުރާއިރު އަބަދުވެސް ރައްޔިތުންނަށް ސަރުކާރުން ކިޔައިދެނީ ބަޖެޓުގައި ހިންގާފައިވާ ތަފާތު މަޝްރޫޢުތަކުގެ ވާހަކައެވެ.
މިވެނި ސަރުކާރަކަށް ވުރެ ގިނަ މަޝްރޫޢު ހިންގަން ރާވާފައިވާ ވާހަކަ އާއި "ބިޔަ މަޝްރޫޢު"ތަކުގެ ވާހަކައެވެ. އެހެން ނަމަވެސް ބަޖެޓް ފާސްކޮށް ނިމޭ ހިސާބުން އެ މަޝްރޫޢުތަކުގެ އަޑު ކެނޑިގެންދެއެވެ. އަނެއްކާވެސް އެވާހަކަތައް ތިލަވަނީ ޖެހިގެން އަންނަ އަހަރުގެ ބަޖެޓު ފާސްކުރުމުގެ މަސައްކަތް ފަށާ ހިސާބުންނެވެ.
2017 ވަނަ އަހަރަށް ދައުލަތުން ފާސްކުރި ބަޖެޓުގައި ވެސް ރައްޔިތުންނަށްޓަކައި އެތައް ކަމެއް ހިމަނާފައިވެއެވެ. ހަމައެހެންމެ ދައުލަތުގެ ވެރިންނަށްޓަކައި ހިމަނާފައިވާ ކަންތައް ވެސް މަދެއް ނޫނެވެ.
އޭގެ ތެރެއިން އެއްކަމަކީ، ދައަލުތުގެ އިއްޒަތްތެރިންނަށް ކާރުކޮޅު ގަތުމަށް 4 މިލިއަން ރުފިޔާ ހިމަނާފައިވުމެވެ.
ރަށްރަށުގެ މަގުތައް ނުބެލެހެއްޓޭ ކަމުގެ ޝަކުވާ އުފުލުމުން ސަރުކާރުން ދައްކާ އުޒުރަކީ ބަޖެޓު ނެތުމެވެ. ވިއްސާރަވެއްޖެ ނަމަ ނިކަމެތި ރައްޔިތުން އެ މަގުތަކުގައި އުޅެން ޖެހެނީ ފަތާފައެވެ.
އެހެން ނަމަވެސް ދައުލަތުގެ ޢިއްޒަތްތެރިން އެމަގުތަކުން ދަތުރުކުރައްވާނީ އަގުބޮޑު ކާރުކޮޅުތަކުގައެވެ. އެ ކާރުކޮޅުތައް މި ގަންނަނީ ނިކަމެތި ރައްޔިތު މީހާ ދައްކާ ޓެކްސް ފާއިސާއިންނެވެ.