މި އަހަރު ބޭއްވި ގޯދިއްޔާ ފުޓްސަލް މުބާރާތުގެ ޗެމްޕިއަން ޓިމާއި ރަނައަޕް ޓީމަށް ދޭން ޖެހޭ ފައިސާގެ އިނާމް ހަވާލު ނުކުރެވި ލަސްވަނީ، ސްޕޮންސަރުންގެ އަތުން ލިބެން ޖެހޭ ފައިސާ ލިބުން ލަސްވާތީ ކަމަށް މަރަދޫ ގޯދިއްޔާ ޖަމިއްޔާ އިން ބުނެފި އެވެ.
މަޝްހޫރު ވިޔަފާރި ކުންފުނި ވީބީ ސްޕޮންސަކޮށްގެން ބޭއްވި މި އަހަރު ގޯދިއްޔާ ފުޓްސަލް މުބާރާތުގެ ޗެމްޕިއަން ޓީމަކީ ހިތަދޫ އެފްސީ ބޭރުމަތި އެވެ. ރަނައަޕް ޓީމަކީ ފޭދޫ އެފްސީ ހަބޭސް އެވެ. ޗެމްޕިއަން ޓީމަށް މި ފަހަރު 80،000ރ. ހުށަހަޅާފައިވާ އިރު، ރަނައަޕް ޓީމަށް ދޭން ނިންމާފައި ވަނީ 30،000ރ. އެވެ.
އެ ޓީމްތަކުން އަންނަނީ ޖޫން މަހުގެ 24 ގައި ނިންމާލި މުބާރާތުގެ ފައިސާގެ އިނާމް ނުލިބޭތީ ކަންބޮޑުވުން ވެސް ފާޅު ކުރަމުންނެވެ.
ގޯދިއްޔާގެ ސެކްރެޓަރީ ޖެނެރަލް ހުސައިން އާބިދު "އައްޑޫ ލައިވް" އަށް މިއަދު ވިދާޅުވީ ޓީމްތަކަށް ފައިސާ ހަވާލު ކުރުން ލަސް ވަނީ ސްޕޮންސަރުންގެ އަތުން ލިބެން ޖެހޭ ފައިސާ ލިބުން ލަސްވެގެން ކަމަށެވެ.
އޭނާ އަދި ވިދާޅުވީ އެކި ސްޕޮންސަރުން އަތުން 200،000ރ. ގޯދިއްޔާ އަށް ލިބެން ޖެހޭ ކަމަށެވެ.
"އެކަމަކު އެ ފައިސާ ނުލިބި ލަސްވާތީ އިނާމް ފައިސާ ހަވާލު ނުކުރެވިގެން މި އުޅެނީ. އެ ފައިސާ ހޯދުމުގެ މަސައްކަތް އަޅުގަނޑުމެން ހަމަ ހުއްޓުމެއް ނެތި އެބަ ކުރަން،" އާބިދު ވިދާޅުވި އެވެ. "އެހެންވީމާ ފައިސާ ހަމަ އަޅުގަނޑުމެންނަށް ލިބޭ އިރަށް ދެ ޓީމަށް ވެސް ފައިސާ ހަވާލު ކުރާނަން. އެކަން އޮންނާނީ ޓީމްތަކަށް ވެސް އަންގާފައި."
އޭނާ ވިދާޅުވީ ފައިސާ ލިބުން ލަސްވާތީ ޓީމްތަކުން ކަންބޮޑުވާނެކަން ވެސް ގަބޫލު ކުރާ ކަމަށާއި އެކަމަކު ގޯދިއްޔާއަކީ ޓީމްތަކަށް ދޭން ޖެހޭ ފައިސާ ނުދީ ތިބޭނެ ބައެއް ނޫން ކަމަށް ވިދާޅުވި އެވެ.
"އަޅުގަނޑުމެން މި މުބާރާތް ބާއްވަމުން އަންނަތާ ވެސް މިހާރު ދިހަ ވަރަކަށް އަހަރުވެއްޖެ. ފައިސާގެ އެއްވެސް މައްސަލައެއް ނޯންނާނެ ދިމާވެފައެއް. އެކަމަކު ކުރިން ވެސް ބުނިގެން މުބާރާތަކީ ސްޕޮންސަޝިޕްގެ އެހީގައި ބާއްވާ މުބާރާތަކަށްވާތީ، އެ ފަރާތްތަކުން ފައިސާ ލިބުން ޑިލޭވެގެން ޓީމްތަކަށް ފައިސާ ހަވާލު ކުރުން ލަސްވެފައި ހުރެދާނެ،" އާބިދު ވިދާޅުވި އެވެ.
ގޯދިއްޔާ ފުޓްސަލް މުބާރާތަކީ ކޮންމެ އަހަރެއްގެ ރޯދަ މަހު މަރަދޫގައި ކުރިއަށް ގެންދާ މުބާރާތެކެވެ.