ހުޅުމީދޫގެ ރުދަމާ ނިޒާމުގެ ހިދުމަތަށް އެދުމުގެ ފުރުސަތު މިދިޔަ ޖުލައި މަހުގެ ތެރޭގައި ހުޅުވާލައި މިދިޔަ މަހުގެ 15 އަށޑް މުއްދަތު ހަމަވި ނަމަވެސް، ހިދުމަތަށް އެދުމުގެ މުއްދަތު ހައުސިން މިނިސްޓްރީން އިތުރުކޮށްފި އެވެ.
އެ މިނިސްޓްރީން މިއަދު ނެރުނު އިއުލާނެއްގައި ބުނީ ނަރުދަމާގެ ހިދުމަތަށް އެދުމުގެ ފުރުސަތު މިއަދުން ފެށިގެން އަންނަ މަހުގެ 31 ވަނަ ދުވަހާ ހަމައަށް ހުޅުވާލާފައިވާ ކަމަށެވެ.
މިނިސްޓްރީން ބުނީ މުއްދަތު އިތުރު ކިރީ ކުރިން ދިން މުއްދަތު ހަމަވިއިރު ބައެއް ގޭބިސީތަކަށް ފޯމް ހުށަހެޅިފައި ނުވާތީ، އެ ފަރާތްތަކަށް ފުރުޞަތު ދިނުމުގެ ގޮތުން ކަމަށެވެ.
މި ޚިދުމަތް ދިނުމަށް ދޭން ހަމަޖެހިފައި ވަނީ އެކަމަށް އެދި ގޭގެ ވެރިފަރާތުން އެޕްލިކޭޝަން ފޯމް ހުށަހެޅުމުންނެވެ.
އެގޮތުން މިހާރު ދީފައިވާ ސުންގަޑި ތެރޭގައި ހިދުމަތަށްް އެދޭ ގޭބިސީތަކުގެ ތެރެއިން ޝަރުތު ހަމަވާ ގޭގެ އަށް ހިލޭ ހޮޅި ގުޅައިދެވޭނެ ކަމަށް މިނިސްޓްރީން ބުންޏެވެ.
ހައުސިން މިނިސްޓްރީން އަދި ބުނީ މުއްދަތުގެ ފަހުން ހުށަހަޅާ ފޯމްތަކަށް، ގޭގެ އަށް ޖަންކްޝަން ހޮޅި ގުޅައި ދެވޭނީ އެ އަވަށެއްގައި އެ ޚިދުމަތް ދިނުމަށް ކަނޑައެޅިފައިވާ ޔުޓިލިޓީ ކުންފުނިން އެކަމަށް ކަނޑައަޅާ ޢުސޫލެއްގެ ދަށުން ކަމަށެވެ.
ނަރުދަމާގެ ހިދުމަތަށް އެދޭ ފޯމް ހުޅުމީދޫން ދޫކުރުމާއި ބަލައި ގަތުން އޮންނާނީ އެ އަވަށުގެ ލޭންޑް، ބިލްޑިން އެންޑް މުނިސިޕަލް ސާވިސަސް ޑިޕާޓްމަންޓްގެ ހުޅުމީދޫ ސެކްޝަނާއި ސިއެރާ ކޮންސްޓްރަކްޝަން ހުޅުމީދޫ ސައިޓް އޮފީހުންނެވެ.
ހުޅުމީދޫ ނަރުދަމާގެ މަސައްކަތް ސަރުކާރުން ހަވާލުކޮށްފައި ވަނީ ސްރީ ލަންކާގެ ސިއެރާ ކުންފުންޏާ އެވެ. އެ މަސައްކަތް މިހާރު އަންނަނީ ކުރަމުންނެވެ. އަދި އަންނަ އަހަރުގެ މާޗަށް މަޝްރޫއު އެއްކޮށް ނިންމައިލާނެ އެވެ.