މިއަންމާގެ ހާލުގައި ޖެހިފައިވާ މުސްލިމުންނަށް އެހީވާން ހިތަދޫ ނޫރުލް އިސްލާމް ޖަމިއްޔާގެ ފަރާތުން މިއަދު އައްޑޫގައި ދެ ފަންޑް ފޮއްޓެއް ބަހައްޓާ ގޮތަށް ނިންމައިފި އެވެ.
އެ ޖަމިއްޔާގެ އޮފިޝަލަކު "އައްޑޫ ލައިވް" އަށް މިއަދު ވިދާޅުވީ ފަންޑް ފޮށިތައް ބަހައްޓާނީ ހިތަދު އާއި ފޭދޫގައި ހުންނަ 3އެސް ސްޕަމާޓްގައި ކަމަށެވެ. މި ފޮށިތަކަށް ފައިސާ ޖަމާ ކުރުން ހުޅުވައިލާނީ މެންދުރު ފަހު 2:00 އިން ފެށިގެންނެވެ.
އޮފިޝަލް ވިދާޅުވީ މި ވަގުތަށް ބަހައްޓާ ދެ ފަންޑް ފޮއްޓަށް ފައިސާ ހަދިޔާ ކުރުމުގެ ފުރުސަތު އަންނަ މަހުގެ 4 ވަނަ ދުވަހާ ހަމައަށް އޮންނާނެ ކަމަށެވެ.
އެހެންވެ ފޯރުންތެރިކަން ހުރި މިންވަރަކުން ވީހާ ވެސް ގިނަ ބަޔަކު ފައިސާގެ އެހީ ދިނުމަށް ނޫރުލް އިސްލާމުން އައްޑޫ ރައްޔިތުންގެ ކިބައިން އެދެ އެވެ.
އެ ޖަމިއްޔާ އިން ވަނީ އަންނަ ހަފުތާ ބަންދުގައި ހިތަދު އާއި ފޭދޫގައި ރޮހިންޖާ މުސްލިމުންނަށް ހާއްސަކޮށްގެން ރޯޑްޝޯތަކެއް ވެސް ބާއްވަން ނިންމައިފަ އެވެ. އަދި މި މަހުގެ 22 ގައި ބޮޑު ރެލީއެއް ވެސް ބާއްވަން ވަނީ ހަމަޖައްސައިފަ އެވެ.
މޫރުލް އިސްލާމުން މީގެ ކުރިން ގާޒާ ފަންޑަށް ވެސް ފަންޑް ފޮށިތަކެއްގެ ޒަރީއާއިން އެހީތެރިކަން ފޯރުކޮށް ދީފަ އެވެ.