ދުންފަތުގެ އިސްތިއުމާލު ނުކުރާ ގޭބިސީތަކަށް އިނާމު ދިނުމާ ބެހޭ އުސޫލް ހެލްތު މިނިސްޓްރީން ގެޒެޓްކޮށްފި އެވެ.
މިއަދު ސަރުކާރުގެ ގެޒެޓްގައި އާންމު ކުރި އުސޫލްގައި ވާގޮތުން "ދުންފަތުގެ އިސްތިޢުމާލު ނުކުރާ ގޭބިސީތަކަށް ދޭ ޢިނާމު" އަކީ ދިވެހިރާއްޖޭގައި ދުންފަތުގެ އިސްތިޢުމާލުކުރުން ކޮންޓްރޯލްކޮށް ދިވެހި ޢާއިލާތައް ދުޅަހެޔޮ ޞިއްޙަތެއްގައި ބޭތިއްބުމަށް ހިތްވަރު ދިނުމުގެ ގޮތުން ޤައުމީ ފެންވަރުގައި މިނިސްޓަރ އޮފް ހެލްތު ދެއްވާ އިނާމެއް ކަމަށެވެ.
އެގޮތުން މި އިނާމުގެ މައިގަނޑު މަޤްސަދަކީ ދިވެހި ގޭބިސީތަކުގައި ދިރިއުޅޭ މީހުންނަކީ ދުންފަތާއި ދުންފަތުގެ ދުމުން ރައްކާތެރިވެ، ޢާންމު ޞިއްޙަތުގެ ދުޅަހެޔޮކަން ދެމެހެއްޓުމާއި، ގޭގައި ދިރިއުޅޭ މީހުން ފުރިހަމަ ޞިއްޙަތެއްގައި ތިބުމަށްޓަކައި ހިތްވަރުދީ، އެކަމުގެ އަގު ސަރުކާރުން ވަޒަންކުރުން ކަމަށްވެސް އެ އުސޫލްގައި ބުނެފައި ވެއެވެ.
މި އިނާމަށް ނަން ހުށަހަޅާ ފަރާތްތަކަކީ ދިވެހި ގޭބިސީއަކަށް ވެފައި، އެ ގޭބިސީގައި ދިރިއުޅޭ ބަޔަކު ދުންފަތުގެ އިސްތިއުމާލު ނުކުރާތާ މަދުވެގެން 01 އަހަރު ދުވަސް ވެފައިވާން ޖެހޭނެއެވެ. އަދި ނަން ހުށަހަޅާ ގޭބިސީއަކީ ދުންފަތުގެ އިސްތިއުމާލު ނުކުރާ ގޭބިސީއެއްކަން ހެލްތު މިނިސްޓްރީން ކުރާ ސާވޭއަކުން ކަނޑައެޅިފައިވާން ޖެހޭނެ އެވެ.
އަހަރު އެއް ފަހަރު ދިނުމަށް ހަމަޖެހިފައިވާ މި އިނާމު ޙައްޤުވާ ފަރާތްތައް ކަނޑައަޅާނީ އެކަމަށްޓަކައި މިނިސްޓަރ އޮފް ހެލްތު އކުލަވާލާ ކޮމިޓީ އަކުންނެވެ.
މިއަދު އާންމު ކުރި އުސޫލްގައި ވަނީ މި އިނާމަށް މުއްދަތު ގުނަން ފަށާނީ އިނާމު އިއުލާން ކުރި ތާރީޚް ކަމަށްވާ 24 އޮގަސްޓް 2016 އިން ފެށިގެން ކަމަށެވެ. މީގެ އިތުރުން މި އިނާމު ލިބޭ ގޭބިސީއެއްގައި ދުންފަތުގެ އިސްތިއުމާލް ކުރުމަކީ މަނާކަމެއް ކަމަށްވެސް އެ އުސޫލްގައި ބުނެފައި ވެއެވެ.
މި އިނާމަށް ނަން ހުށަހެޅުމުގެ ފުރުސަތު އަދި ހުޅުވާލާފައި ނުވެއެވެ.