ރައީސް ނަޝީދުގެ ސަރުކާރުން ހިތަދޫގައި އިމާރާތްކުރި ކޮންވެންޝަން ސެންޓަރ ރޫޅާލައި އެތަނުގައި ހަދާ 100 އެނދުގެ ހޮސްޕިޓަލް އަންނަ މޭއި މަހަށް ނިމޭނެކަމަށް ހައުސިން މިނިސްޓަރ ޑރ. މުޙައްމަދު މުއިއްޒު ވިދާޅުވެއްޖެއެވެ.
އައްޑޫގައި ކުރިއަށްދާ ތަރައްޤީގެ މަޝްރޫއުތައް ބައްލަވާލެއްވުމަށް ރޭ އައްޑޫއަށް ވަޑައިގެންނެވި މުއިއްޒު ވަނީ މިއަދު ހެނދުނު ހޮސްޕިޓަލްގެ މަސައްކަތް ކުރިއަށްދާ ގޮތް ބައްލަވާ ލައްވާފައެވެ.
މުއިއްޒު ވިދާޅުވީ ހޮސްޕިޓަލްގެ މަސައްކަތް ކުރިއަށްދަނީ ހާއްސަ ޕްރޮޖެކްޓް މެނޭޖްމަންޓް ޓީމެއްގެ ބެއްލެވުމުގެ ދަށުން ކަމަށެވެ.
ސައުދީ އަދި އޯފިޑްގެ ލޯން އެހީގެ ދަށުން ލިބިފައިވާ 24 މިލިއަން ޑޮލަރު ހަރަދުކޮށްގެން އީސީސީ ރޫޅާލުމަށްފަހު ހޮސްޕިޓަލަކަށް ބަދަލު ކުރުމަށް ހަވާލުކޮށްފައިވަނީ އެލިއާ ކޮންސްޓްރަކްޝަން އާއިއެވެ. 161 މިލިއަން ރުފިޔާއަށް އީސީސީގައި ހޮސްޕިޓަލް ހަދާއިރު މިތަނަށް އެންމެ ފަހުގެ މެޝިނަރީޒް ގެންނާނެކަމަށް ހެލްތު މިނިސްޓްރީން ވަނީ ބުނެފައެވެ.
އީސީސީ ހޮސްޕިޓަލަށް ބަދަލު ކުރާއިރު އެތަން ރޫޅާލައި ބައެއް ސާމާން މާލެ ގެންގޮސްފައިވާއިރު އަނެއް ބައި ތަކެތި ވެއްދުމަށް ހިތަދޫގައި ހުންނަ ހައުސިން މިނިސްޓްރީގެ އިދާރާގެ ގޯތި ތެރޭގައިވަނީ 2 މިލިއަން ހަރަދުކޮށްގެން ގުދަނެއް އަޅާފައެވެ.