އައްޑޫގައި ބޭއްވި ދެވަނަ މެރަތަން "ކޮކާކޯލާ ރަން އިން އައްޑޫ" ދުވުމުގައި މަޝްހޫރު އައްޑޫ ދުވުންތެރިޔާ އަހުމަދު އާތިފް މިއަދު ކާމިޔާބްކޮށްފި އެވެ.
ހިތަދޫ، ލައިފް، އާތިފް މެރަތަން ކާމިޔާބް ކުރީ 3 ގަޑި 39 މިނިޓުންނެވެ. މީގެ މަހެއްހާ ދުވަސް ކުރިން އައި ރަނާސް އިން އައްޑޫގައި ބޭއްވި އައްޑޫ މެރަތަން އޭނާ ކާމިޔާބްކޮށްފައި ވަނީ 3 ގަޑި 37 މިނިޓުންނެވެ.
ޖުމްލަ 312 ދުވުންތެރިންނާ އެކު ބޭއްވި "ރަން އިން އައްޑޫ" ގެ މެރަތަން ދުވުން މިއަދު ފެށީ ފަތިހު 4:30 ގަ އެވެ. މި ދުވުމުގައި މާލެ އާއި ރާއްޖޭން ބޭރުން ދުވުންތެރިން ވަނީ ބައިވެރިވެފަ އެވެ.
ޓީއެފްޖީން އިންތިޒާމްކޮށްގެން ބޭއްވި މި އިވެންޓަށް ގިނަ ބައެއްގެ ތަރުހީބު ވަނީ ލިބިފަ އެވެ. އެގޮތުން އައްޑޫ އަންހެނުންގެ ކޮމެޓީ، އައްޑޫ ޕޮލިސް އަދި މޯލްޑިވްސް ރެޑް ކްރެސެންޓްގެ އައްޑޫ ގޮފިން ވަނީ ބޮޑު އެހީތެރިކަމެއް ލިބިފަ އެވެ. މީގެ އިތުރުން ވެސް އައްޑޫ ސިޓީ ކައުންސިލާއި ފެނަކަ ކޯޕަރޭޝަންގެ އިތުރުން ވެސް އެތައް ބެއެއްގެ ފުރިހަމަ އެހީތެރިކަން ވަނީ މި އިވެންޓަށް ލިބިފަ އެވެ.
"ރަން އިން އައްޑޫ" މެރަތަން ގެ ކުރިން އިއްޔެ ވެސް ވަނީ ހާއްސަ އިވެންޓެއް ބާއްވައިފަ އެވެ. އިއްޔެ ބޭއްވި ކުޑަކުދިންގެ ދުވުމާއި އުމުރުން ދުވަސްވީ މީހުންގެ ހިނގާލުމަށް ވެސް ވަނީ ބޮޑު ތަރުހީބެއް ލިބުނެވެ.
މިއިވެންޓް ކާމިޔާބް ކަމާއި އެކު ނިންމާލުމުގައި އައްޑޫ ރައްޔިތުންގެ ފަރާތުން ލިބުނު އެއްބާރުލުން ފާހަގަކޮށް ޓީއެފްޖީގެ ސީއީއޯ ހުސެއިން ޒިނާން ވަނީ އައްޑޫ ރައްޔިތުންނަށް ޝުކުރު ދަންނަވާފައެވެ.
"ރަން އިން މޯލްޑިވްސް" ސީރީސްގެ ދަށުން ކުރިއަށް ގެންދާ މިސީރީސްގެ ދެން އޮންނާނީ "ރަން އިން ލާމު" ދުވުމެވެ.