ހުޅުމީދޫގައި އިމާރާތްކޮށްފައިވާ ފްލެޓްތައް ހުރި ސަރަހައްދުގެ ލޭންޑް ސްކެޕިން މަސައްކަތް މި މަހު ފެށޭނެ ކަމަށް ހައުސިން މިނިސްޓަރު ޑރ. މުހައްމަދު މުއިއްޒު ވިދާޅުވެއްޖެ އެވެ.
މިދިޔަ ބުރާސްފަތި ދުވަހު ފްލެޓްތައް ބައްލަވައި ލެއްވުމަށް ފަހު މިނިސްޓަރު، ހުރިހާ މަސައްކަތްތަކެއް ނިންމައި ފްލެޓްތައް މި އަހަރު ނިމުމުގެ ކުރިން ހަވާލު ކުރަން އަމާޒު ހިފާފައިވާ ކަމަށެވެ.
ސަރުކާރުގެ ބޯހިޔާވަހިކަމުގެ ޕްރޮގްރާމްގެ ދަށުން ހުޅުމީދޫގައި ވަނީ ޖުމްލަ 48 ފްލެޓް އަޅައިފަ އެވެ.
މި ފްލެޓްތަކަށް ކުރިމަތިލާން މިހާތަނަށް ތިން ފަހަރެއްގެ މަތިން ހުޅުވާލި ނަމަވެސް، އާންމުންގެ ފަރާތުން އެކަށީގެންވާ ތަރުހީބެއް ނުލިބެ އެވެ. އެހެންވެ އުސޫލްތަކަށް ބައެއް ބަދަލުތައް ގެނެސް އެންމެ ފަހުން ފުރުސަތު ހުޅުވައިލީ ޖޫން މަހުގެ 20 ވަނަ ދުވަހު އެވެ، އަދި ސުންގަނޑި ހަމަވީ މިދިޔަ މަހުގެ 9 ގަ އެވެ.
ހުޅުމީދޫ ފްލެޓްތަކަށް ކުރިމަތިލާނެ މީހުން ނުވެގެން އުޅޭ އިރު، ހިތަދޫގައި ހެދި 264 ފްލެޓްތަށް މިދިޔަ އަހަރު ފުރުސަތު ހުޅުވާލުމުން 585 މީހަކު ވަނީ ފޯމް ލައިފަ އެވެ.
އެހެން ނަމަވެސް ފްލެޓްތައް ދޫކުރުން ލަސްވުމުގެ ޝަކުވާ ވަރަށް ބޮޑެވެ.
މިނިސްޓަރު ވަނީ ހިތަދޫ ފްލެޓްތަކުގެ މަސައްކަތް ވެސް ބައްލަވާލައްވައިފަ އެވެ. އަދި ވަރަށް އަވަހަށް ފްލެޓްތައް ހަވާލު ކުރެވޭނެ ކަމަށް ވިދާޅުވި އެވެ.