އައްޑޫގައި އިމާރާތްކޮށްފައިވާ ފްލެޓްތައް ލިބޭ މީހުންގެ ލިސްޓް އަންނަ މަހުގެ ތެރޭގައި އިއުލާން ކުރާނެ ކަމަށް ހައުސިން މިނިސްޓަރު ޑރ. މުހައްމަދު މުއިއްޒު މިއަދު ވިދާޅުވެއްޖެ އެވެ.
މާލޭން ދާދި ފަހުން ފްލެޓް ދޫކުރި ގޮތާ ގުޅޭ ގޮތުން މައުލޫމާތު ދޭން ބޭއްވި ނޫސް ކޮންފަރެންސްގައި މިނިސްޓަރު ވިދާޅުވީ އައްޑޫގެ އިތުރުން ފުވައްމުލަކާއި ތިނަދޫން ވެސް ފްލެޓް ލިބޭ މީހުންގެ ލިސްޓް އަންނަ މަހު އިއުލާން ކުރާނެ ކަމަށެވެ.
އެހެން ނަމަވެސް ލިސްޓް އާންމު ކުރާނެ ތާރީހެއް ވިދާޅެއް ނުވެ އެވެ.
ސަރުކާރުގެ ބޯހިޔާވަހިކަމުގެ ޕްރޮގްރާމްގެ ދަށުން ހިތަދޫގައި އިމާރާތްކޮށްފައިވާ 264 ފްލެޓް ލިބޭ މީހުންގެ ލިސްޓް މިދިޔަ ފިތުރު އީދު ބަންދު ނިމުމަކާ އެކު އިއުލާން ކުރާނެ ކަމަށް ވެސް ހައުސިން މިނިސްޓްރީން ބުނެފައިވެ އެވެ.
ފްލެޓްތަށް މިދިޔަ އަހަރު ފުރުސަތު ހުޅުވާލުމުން 585 މީހަކު ވަނީ ފޯމް ލައިފަ އެވެ.
ހިތަދޫގެ އިތުރުން ހުޅުމީދޫގައި ވަނީ 48 ފްލެޓް އިމާރާތްކޮށްފަ އެވެ.