ހުޅުމީދޫގައި ހަދަމުން އަންނަ މަސް ފެކްޓްރީ މި އަހަރުގެ ފަހުކޮޅު ހުޅުވާނެ ކަމަށް އެ މަޝްރޫއު ކުރިއަށް ގެންދާ މިފްކޯ އިން ބުނެފި އެވެ.
މި މަޝްރޫއު ރަސްމީކޮށް އިއުލާން ކުރީ ޑިސެމްބަރު 28، 2014 ދުވަހު ނަމަވެސް، ފެކްޓްރީގެ އަމަލީ މަސައްކަތް ފެށުނީ މިދިޔަ އަހަރުގެ ތެރޭގަ އެވެ.
މަސް ފެކްޓްރީގެ ބިންގާ އެޅީ ޖެނުއަރީ 9، 2016 ގަ އެވެ.
މިފްކޯ އިން ބުނީ ހަތް މިލިއަން ޑޮލަރު ހަރަދުކޮށްގެން ގާއިމު ކުރާ އައްޑޫ މަސް ފެކްޓްރީއަކީ 1،500 ޓަނުގެ ކޯލްޑް ސްޓޯރޭޖް ފެސިލިޓިއަކާ އެކު ދުވާލަކު 100 ޓަނުގެ މަސް ގަނޑުކުރެވޭ ގޮތަށް ގާއިމު ކުރާ ތަނެއް ކަމަށެވެ. އަދި އެ ފެކްޓަރީގައި 50 ޓަނުގެ އައިސް ޕްލާންޓަކާއި 200 ޓަނުގެ ތެލާއި 250 ޓަނުގެ ފެން އެއްފަހަރާ ރައްކާ ކުރެވޭނެ އެވެ.
މަސް ފެކްޓްރީގެ މަސައްކަތް މިހާރު ގާތްގަނޑަކަށް ނިމިފައިވާ ކަމަށާއި އަހަރުގެ ފަހުކޮޅު އެތަން ރަސްމީކޮށް ހުޅުވާނެ ކަމަށް މިފްކޯ އިން ބުނި ނަމަވެސް އަދި ވަކި ތާރީހެއް އިއުލާނެއް ނުކުރެ އެވެ.