ވައިގެ މަގުން އައްޑު އަށް އެތެރެ ކުރަން އުޅުނު ގިނައަދަދެއްގެ މަސްތުވާތަކެތި ހޯދައި، ފަސް ބިދޭސީއަކު ފުލުހުންގެ ބެލުމުގެ ދަށަށް ގެންގޮސް، ބަންދުގެ މުއްދަތު ޖަހަން ހިތަދޫ މެޖިސްޓްރޭޓް ކޯޓަށް ގެންދިއުމުން ދޫކޮށްލައިފި އެވެ.
މި މައްސަލައާ ގުޅިގެން ފުލުހުންގެ ބެލުމުގެ ދަށަށް ގެންދިޔައީ 28 އަހަރުގެ ފިރިހެނަކާއި 29 އަހަރުގެ ފިރިހެނަކާއި 32 އަހަރުގެ އަންހެނަކާއި 39 އަހަރުގެ ފިރިހެނެއްގެ އިތުރުން 47 އަހަރުގެ އަންހެނެކެވެ. މި ފަސް މީހުންނަކީީ އިންޑިއާ އަށް ނިޞްބަތްވާ ފަސް މީހުންނެވެ.
މި ފަސް މީހުން ފުލުހުންގެ ބެލުމުގެ ދަށަށް ގެންދިޔައީ ކޮލަމްބޯއިން ގަމަށް ވައިގެ މަގުން ދަތުރު ކުރި ފުލައިޓަކުން މަސްތުވާތަކެތި އެތެރެކުރާ ކަމަށް ފުލުހުންގެ އިންޓެލިޖެންސަށް ލިބުނު މައުލޫމާތަކާ ގުޅިގެން ހިންގި އޮޕަރޭޝަނުގައި މިި މަހުގެ 18 ވަނަ ދުވަހު އެއާޕޯޓުންޏެވެ.
މި ފަސް މީހުން ފުލުހުންގެ ބެލުމުގެ ދަށަށް ގެންގޮސް އެ މީހުންގެ ހަށިގަނޑާއި ތަކެތި ބަލައި ފާސްކުރިއިރު އެ މީހުން ގެނައި ލަގެޖް ފޮށިތަކުން ނެގި ރަބަރު ކޮތަޅު ތަކެއްގެ ތެރެއިން މަސްތުވާތަކެތި ކަމަށް ޝައްކު ކުރެވޭ އެއްޗެހިތަކެއް ފެނިފައިވެ އެވެ. އެތަކެތީގެ ބަރުދަނުގައި 4.65 ކިލޯ ގްރާމް ހުއްޓެވެ.
މީގެ އިތުރުން އެ ފޮށިތަކުން މަސްތުވާތަކެތި ބޭނުން ކުރުމަށް ގެންގުޅޭ ބައެއް ކަހަލަ ތަކެތި ވެސް ފެނިފައިވެ އެވެ.