އައްޑޫ ސިޓީ ޕޮލިހާއި މޯލްޑިވްސް ރޯވިން އެސޯސިއޭޝަން ގުޅިގެން ހުޅުމީދޫގެ ސްކޫލްތަކުގެ 15 އަހަރުން މަތީގެ ދަރިވަރުންނަށް ހާއްސަކޮށްގެން ރޯވިން ކޭމްޕެއް ބާއްވައިފި އެވެ.
މި މަހުގެ 21 ފެށިގެން ތިން ދުވަހުގެ މުއްދަތަށް ބޭއްވި ކޭމްޕްގެ މަޤްޞަދަކީ، ރޯވިންއަކީ ކުރިއަރަމުން އަންނަ ކުޅިވަރަކަށްވުމާ އެކު ޒުވާން ކުދިންގެ މެދުގައި މި ކުޅިވަރަށް ޝައުޤުވެރިކަން އުފައްދައި، މިކުޅިވަރު ކުރިއެރުވުމެވެ.
މި ކޭމްޕުގައި ޖުމްލަ 17 ދަރިވަރުން ބައިވެރިވެފައިވާ އިރު މި ދަރިވަރުންގެ ތެރޭގައި ހިމެނެނީ ހަތަރު އަންހެން ކުދިންނާއި 13 ފިރިހެން ކުދިންނެވެ.
ކޭމްޕް ނިންމުމުގެ ގޮތުން ބޭއްވި ރަސްމިއްޔާތު ޝަރަފްވެރިކޮށް ދެއްވައި ހަނދާނީ ލިޔުން ބައްސަވައި ދެއްވީ ޔުނިސެފް ޕްރޮގްރާމްގެ ސްޕެޝަލިސްޓް މުޙައްމަދު ނަޢީމެވެ. ރަސްމިއްޔާތުގައި ސައުތު ޕޮލިސް ޑިވިޝަންގެ ކޮމާންޑަރު ޗީފް އިންސްޕެކްޓަރު އޮފް ޕޮލިސް ޢަލީ ޝަރީފާއި އައްޑޫ ސިޓީ ޕޮލިސްގެ ހެޑް އިންސްޕެކްޓަރު އޮފް ޕޮލިސް ޖަމްޝީދު ޢަލީ އާއި ސ. އަތޮޅު މަދަރުސާ އާއި ހުޅުދޫ ސްކޫލުގެ އިސްވެރިންގެ އިތުރުން ރޯވިނގ އެސޯސިއޭޝަންގެ އިސްވެރިން ބައިވެރިވެފައިވެ އެވެ.