ސިންގަޕޫރުގައި ބާއްވާ އޭޝިއަން ޖޫނިއާ ޗެމްޕިއަންޝިޕަށާއި އޮލިމްޕިކް ކޮލިފިކޭޝަންގައި ބައިވެރިވުމަށް ރޯވިން އެސޯސިއޭޝަން އޮފް މޯލްޑިވްސްގެ ޓީމެއް ސިންގަޕޫރަށް އިއްޔެ ފުރައިފި އެވެ.
އެ ދެމުބާރާތުގައި ބައިވެރިވާ ސިންގަޕޫރަށް ދިޔަ ޓީމުގައި ހިމެނެނީ ދެ އެތުލީޓަކާއި ކޯޗެކެވެ. ދެ އެތުލީޓުންނަކީ މަރަދޫ 14 އަހަރުން ދަށުގެ ދެ ކުދިން ކަމަށްވާ އިރުޝާދިއްޔާ ސްކޫލްގެ ރިކާޒާއި ހިތަދޫ ސްކޫލްގެ ކަމަށްވާ އުމާނެވެ.
ދެ މުބާރާތުގައި ބައިވެރިވުމުގެ ކުރިން މިއަދުން ފެށިގެން އަންނަ މަހުގެ 14 އަށް ސިންގަޕޫރުގައި ބާއްވާ ޓްރެއިނިން ކޭމްޕެއްގައި ވެސް ދެ އެތުލީޓުން ބައިވެރިވާނެ އެވެ.
މިއީ ވޯލްޑް ރޯވިން ފެޑެރޭޝަން (ފީސާ) އާއި އޮލިމްޕިކް ސޮލިޑަރިޓީ އާއި އޭޝިއަން ރޯވިން ފެޑެރޭޝަން ގުޅިގެން ހިންގާ ކޭމްޕެކެވެ. އެ ކޭމްޕުގައި ބައިނަލްއަގުވާމީ އެލީޓް ކޯޗުންގެ އިރުޝާދު ދިވެހި އެތުލީޓުންނާއި ގައުމީ ކޯޗަށް ލިބޭނެ އެވެ.
ކޭމްޕަށް ފަހު އަންނަ މަހުގެ 11 ވަނަދު ވަހު ފަށާ އޭޝިއަން ޖޫނިއާ ޗެމްޕިއަންޝިޕްގައި ރިކާޒާއި އުމާން ބައިވެރި ވާނެ އެވެ. އަދި އޮކްޓޯބަރު 13-15 އަށް އޮންނަ އޮލިމްޕިކް ކޮލިފިކޭޝަނުގައި ވެސް ދެ އެތުލީޓުން ވާދަ ކުރާނެ އެވެ.
ރޯވިން އެސޯސިއޭޝަނުން ވިދާޅުވީ އެކުދިންނަކީ 14 އަހަރުގެ ދެކުދިން ކަމަށެވެ. އެފަދަ ޅައުމުރުން ފެށިގެން ރޯވިންގައި ބައިވެރިވެ ތަމްރީންތައް ލިބިގަތުމަކީ ރާއްޖޭގައި ރޯވިންގެ މުސްތަގުބަލް އުޖާލާވާނެ ކަމުގެ ދަލީލެއް ކަމަށެވެ.