އެމެރިކާގެ ކުރީގެ ރައީސް ބަރަކް އޮބާމާ އޭނާގެ ދޮށީ ދަރިފުޅު، މާލިއާ އޮބާމާ ކޮލެޖަށް ދިއުމުން ކަރުނަ އަޅާ ރުއި ކަމަށް ވިދާޅުވެއްޖެއެވެ.
ދުނިޔޭގެ އެތައް މިލިއަން ބައެއްގެ ސަޕޯޓު ހޯދާފައިވާ އޮބާމާ ބުނެފައިވަނީ ދަރިފުޅު 18 އަހަރަށްފަހަށް ވަކިވުމުން ސިފަކުރެވެނީ ހިތުގެ އޮޕަރޭޝަނެއް ކުރުން ކަމަށެވެ.
އޮބާމާގެ ދޮށީ ދަރިފުޅު މާލިއާ ވަނީ ހައި ސްކޫލަށް ފަހަށް އެއް އަހަރު ކިޔެވުމާއި ދުރުގައި މަޑުކޮށްފައެވެ. އަދި މިއަހަރު ހާވާޑް ޔުނިވާސިޓީއަށް މާލިއާ ގޮސްފައިވާއިރު އޮބާމާއަށް ލިބުނީ އޭގެ ސަބަބުން ހިތްދަތި ކަމެކެވެ.
އަބަދުވެސް ކުދިންނާއި އަނބިކަނބަލުން މިޝެލް އޮބާމާއާ ވަރަށް ގާތުން މަސައްކަތް ކުރައްވާ އޮބާމާ އިތުރަށް ބުނެފައިވަނީ މާލިއާ ކުރިމަތީގައި ނުރޮވުނުކަމާމެދު އުފާ ކުރާ ކަމަށެވެ. ނަމަވެސް އެނބުރި އައި މަގުމަތީގައި ކަރުނަތައް ހިފަހައްޓާނުލެވުނު ކަމަށް އޮބާމާ ވަނީ ބުނެފައެވެ.
ހުރިހާވެސް އުއްމީދަކީ ކުދިންގެ މުސްތަގުބަލު ކަމަށާއި ކުރެވުނު ހުރިހާ ކަމެއްގެ ތެރެއިންވެސް އެންމެ ފަޚުރުވެރިވަނީ ދެކުދިންގެ ބައްޕައަށްވުން ކަމަށް އޮބާމާ ވަނީ ރައީސްކަމުގެ ވަދާއީ ސްޕީޗުގައި ބުނެފައެވެ.