"އާޝިގީ" ފަދަ ފިލްމްތަކުން ފެނިފައިވާ އެމެރިކާ ދަރިކޮޅުގެ ބޮލީވުޑްގެ ދުވަސްވީ މަޝްހޫރު އެކްޓަރު ޓޮމް އޮލްޓާ ހަމުގެ ކެންސަރަށް ފަރުވާ ހޯދަމުން ދަނިކޮށް މިއަދު މަރުވެއްޖެ އެވެ.
މީޑިއާ ރިޕޯޓްތައް ބުނާ ގޮތުން ހަމުގެ ކެންސަރުގެ ހަތަރު ވަނަ ސްޓޭޖްގައި އޮތް ޓޮމް، 67، މަރުވީ މުމްބާއީގައި ހުންނަ އޭނާގެ ގޭގަ އެވެ.
އޭނާ ހަމުގެ ކެންސަރަށް ފަރުވާ ހޯދާކަން އާއިލާ އިން ރަސްމީކޮށް އިއުލާން ކުރީ މި މަހުގެ ކުރީކޮޅު އެވެ.
ކުރީގެ ވަރަށް މަޝްހޫރު ސިލްސިލާއެއް ކަމަށްވާ "ޒުބާން ސަމާލްކޭ" އިން އާންމުންގެ ސަމާލުކަން ހޯދި ޓޮމް ވަނީ ހިންދީ ވަރަށް ގިނަ ފިލްމްތަކުގެ އިތުރުން ހޮލީވުޑްގެ ފިލްމްތަކުގައި ވެސް މަސައްކަތްކޮށްފަ އެވެ. ހިންދީ ފިލްމްތަކުގައި އޭނާ ބޮޑަަށް ކުޅެފައި ހުރީ ނެގަޓިވް ރޯލްތަކެވެ.
ޓީމްގެ ފާހަގަކޮށްލެވޭ ބައެއް ފިލްމްތަކުގެ ތެރޭގައި ބޭޖާ ފްރައި (2007)، ވީރް-ޒާރާ (2004) އަދި ޕަރިންދާ (1989) ފަދަ ފިލްމްތައް ހިމެނެ އެވެ.
އިންޑިއާ ސަރުކާރުން 2008 ގައި ޕަދްމަ ޝްރީ އެވޯޑް ވެސް އަރުވާފައިވާ ޓޮމް އެންމެ ފަހުން ފެނިގެން ދިޔަ ފިލްމަކީ މި އަހަރުގެ މެއި މަހު ރިލީޒް ކުރި "ސަރްގޯޝިޔާ" އެވެ.