ހުޅުމާލޭގައި ބުރާސްފަތި ދުވަހުގެ ރޭ ކުއްލި ގޮތަކަށް ދެ ޒުވާނަކު މަރުވި ހާދިސާއާ ގުޅޭ ގޮތުން ފެންމަތިވި ވާހަކަތާ ގުޅިގެން ސްކޫލުތަކުގެ އާ ވައްތަރެއްގެ ޑްރަގެއް ދައުރުވާ ކަމަށް ބުނެ ސޯޝަލް މީޑިއާގައި ދައުރުވާ މެސެޖަކީ ހަގީގަތެއް ނޫން ކަމަށް ފުލުހުން ބުނެފި އެވ.
ސޯޝަލް މީޑިއާ މެސެޖްގައި ބުނަނީ "ސްޓްރޯބެރީ ކްއިކް" ނަމަކަށް ކިޔާ ޑްރަގެއް ސްކޫލްތަކުގައި ދައުރުވަމުންދާ ކަމަށެވެ. އެގޮތުން ސްކޫލް ދަރިވަރުންނަށް ޗޮކްލެޓް ނުވަތަ ކޭންޑީއެއްގެ ގޮތުގައި މީހުން އެ ޑްރަގު ދެމުންދާ ކަމަށާއި އޭގެ ރަހަތައް ހުންނަނީ ކުޑަކުދިން ގަޔާވާ ފްލޭވާ ތަކުގެ ރަހައިގައި ކަމަށް ބުނެފައިވެ އެވެ.
އެހެންކަމުން ގޮތް ނޭނގޭ މީހުންދޭ އެފަދަ ތަކެތި ބޭނުން ނުކުރުމަށް ދަރިވަރުންނަށް ނަސޭހަތްތެރި ވުމަށް ވެސް މެސެޖްގައި ބުނެފައިވެ އެވެ.
ނަމަވެސް "ނިއު ޑްރަގް އިން ސްކޫލްސް"ގެ ނަމުގައި ދައުރުވާ މެސެޖާ ގުޅިގެން ފުލުހުން މިއަދު ބުނީ އެފަދަ އެއްވެސް މައްސަލައެއް ނުވަތަ މެސެޖުގައި ބަޔާންކޮށްފައިވާ ހާތަލަށް ނިސްބަތްވާ މައްސަލައެއް އެއްވެސް ސްކޫލަކުން ނުވަތަ ޓީޗަރެއް އަދި ބެލެނިވެރިއެއްގެ ފަރާތުން ވެސް ރިޕޯޓްކޮށްފައި ނުވާ ކަމަށެވެ. އަދި އާއްމު ފަރާތަކުން ވެސް އެފަދަ މައްސަލައެއް ރިޕޯޓްކޮށްފައި ނުވާ ކަމަށް ފުލުހުން ބުންޏެވެ.
ފުލުހުން ބުނީ އެ މެސެޖުގެ އަސްލަށް ބަލާ އިރު ވެސް އެއީ ރަނގަޅު މައުލޫމާތެއް ނޫން ކަމަށް ފުލުހުންނަށް ޔަގީން ކުރެވޭ ކަމަށެވެ. އެހެންކަމުން މިހާރު ދައުރު ކުރަމުންދާ އެ މެސެޖަކީ ހަގީގަތެއް އެކުލެވޭ މެސެޖެއް ނޫންކަން ކަށަވަރުކޮށް ދޭ ކަމަށް ފުލުހުން ބުންޏެވެ.