މިއަދު ފާހަގަ ކުރާ ބައިނަލްއަޤްވާމީ އުމުރުން ދުވަސްވީ މީހުންގެ ދުވަހުގެ މުނާސަބަތުގައި ޖެންޑަ މިނިސްޓްރީން ބޭއްވި ރަސްމިއްޔާތެއްގައި، "ދޮށީ އުމުރުގެ މީހުންގެ ޤައުމީ ސިޔާސަތު" ނައިބު ރައީސް ޢަބްދުﷲ ޖިހާދު އިފްތިތާޙްކޮށް ދެއްވައިފި އެވެ.
މި ރަސްމިއްޔާތު އޮތީ މިއަދު އިސްލާމިކް ޔުނިވަރސިޓީގައެވެ.
ދޮށީއުމުރުގެ މީހުންގެ ޤައުމީ ސިޔާސަތު އިފްތިތާޙްކޮށް ދެއްވުމަށް ފަހު ޖިހާދު ވިދާޅުވީ އެ ސިޔާސަތަކީ، މިހާރުގެ ސަރުކާރުން ދޮށީ ޢުމުރުގެ މީހުންގެ ޙައްޤުތައް ރައްކާތެރިކޮށް ކުރިއެރުވުމުގެ ވަޢުދުގެ ދަށުން އެކުލަވާލާފައިވާ ސިޔާސަތެއްކަމަށާއި ސަރުކާރުގެ މި ވަޢުދު ތަންފީޒު ކުރުމަށްޓަކައި ސަރުކާރުގެ އެކި މުއައްސަސާތަކުން ގިނަގުނަ މަސައްކަތްތަކެއް ކުރައްވަމުން ގެންދަވާ ކަމަށެވެ. އަދި، މި ސިޔާސަތު އެކުލަވާލެއްވުމަށްޓަކައި ރައީސް ޢަބްދުﷲ ޔާމީން ދެއްވި ލަފާފުޅާއި އިރުޝާދުތަކަށްޓަކައި އެ މަނިކުފާނަށް ޝުކުރު އަދާކުރެއްވި އެވެ.
ޖިހާދު ވިދާޅުވީ ޤައުމެއްގެ ރައުސްމާލަކީ އެ ޤައުމެއްގެ ޒުވާނުން ކަމަށާއި ހަމައެއާ އެކު އެ ޤައުމެއްގެ އެންމެ އަގު ބޮޑު ޚަޒާނާއަކީ އެ ޤައުމެއްގައި ދިރިއުޅުއްވާ ދޮށީ ޢުމުރުގެ ބޭފުޅުން ކަމަށެވެ. އަދި އެ ބޭފުޅުންނަށް އެހާ ބޮޑު ޤަދަރެއް އަޅުގަނޑުމެން ދޭން ޖެހޭ ސަބަބަކީ، ދޮށީ ޢުމުރުގެ ބޭފުޅުންނަށް އެ ބޭފުޅުންގެ ހަޔާތުގައި ލިބިވަޑައިގެންފައިވާ ތަޖުރިބާ ކަމަށް އެ މަނިކުފާނު ވިދާޅުވި އެވެ.