އެސްޓީއޯ އިން ވިއްކާ ޑީސަލާއި ޕެޓްރޯލްގެ އަގު ބޮޑު ކުރިޔަސް ފެނަކަ ކޯޕަރޭޝަނުން ނަގާ ފިއުލް ސާޗާޖް ބޮޑު ނުކުރާނެ ކަމަށް އެ ކުންފުނިން ބުނެފި އެވެ.
އެސްޓީއޯ އިން ވަނީ އިއްޔެ އިން ފެށިގެން، ޑީސަލް ލީޓަރަކުން 53 ލާރި އަދި ޕެޓްރޯލް ލީޓަރަކުން 57 ލާރި ބޮޑުކުރަން ނިންމައިފަ އެވެ.
އެ ކުންފުނިން ގެނައި މި ބަދަލާ ގުޅިގެން ރާއްޖޭގެ 152 ރަށަކަށް ކަރަންޓް ދެމުން އަންނަ ފެނަކަ ކޯޕަރޭޝަންގެ މެނެޖިން ޑިރެކްޓަރު އަހުމަދު ޝަރީފު ވިދާޅުވީ، އެ ކުންފުނިން ފޯރުކޮށްދޭ ފިއުލް ސާޗާޖު ބޮޑު ނުކުރަން ނިންމީ ސަރުކާރުގެ ލުއި ފަސޭހަކޮށްދިނުމުގެ ސިޔާސަތުގެ ދަށުން ކަމަށެވެ.
ކަރަންޓުގެ ހިދުމަތް ދޭ ކުންފުނިތަކަށް ޑީސަލް ގަންނަން ލިބޭ އަގު ލީޓަރެއް 8ރ. އަށް ވުރެ ބޮޑުވާ ނަމަ އިތުރުވާ ކޮންމެ ދިހަ ލާރިއަކުން ތިން ލާރި ފިއުލް ސާޗާޖުގެ ގޮތުގައި ނެގިދާނެ ކަމަށް އެނާޖީ އޮތޯރިޓީން އޮންނަނީ ކަނޑައަޅައިފަ އެވެ.