ސަންޖޭ ލީލާ ބަންސާލީގެ އާ ފިލްމް "ޕަދްމާވަތީ" ގެ ލީޑް ކާސްޓުންގެ ޕޯސްޓަރުތަކާ އެ މީހުންގެ ލުކްސް އާންމު ކުރަމުން އަންނަ އިރު، ގިނަ ބަޔަކު އެންމެ ބޮޑަށް އިންތިޒާރު ކުރަމުން އައީ ރަންވީރު ސިންގްގެ ލުކަކަށެވެ. އެ އިންތިޒާރަށް މިހާރު ނިމުން ގެނެސް ދީފައިވާ އިރު، ފިލްމްގައި ރަންވީރު ފެނިގެން ދާނީ މާ ބޮޑަށް ވެސް ތަފާތުކޮށެވެ.
ރަންވީރު ހިމެނޭ "ޕަދްމާވަތީ" ގެ ދެ ޕޯސްޓަރެއް ދައްކާލައިފައިވާ އިރު، ދެ ޕޯސްޓަރުގައި ވެސް އޭނާ ފެންނަނީ ދިގު އިސްތަށިގަނޑަކާއި ވަރުގަދަ ތުނބުޅިއަކާ އެކު ނުލަފާ ކެރެކްޓާއެއްގެ ގޮތުގަ އެވެ. ޕޯސްޓަރުން އަދި ފާހަގަ ކުރެވޭ ގޮތުގައި ރަންވީރުގެ ވާތު ލޯކައިރިން ބޮޑު ލަކުނެއް ވެސް ފެނެ އެވެ.
ތާރީހީ ލޯބީގެ ވާހަކައަކަށް ހަދާފައިވާ "ޕަދްމާވަތީ" ގައި ރަންވީރު ކުޅެނީ ސުލްތާން އަލާއުއްދީން ހިލްޖީގެ ކެރެކްޓާ އެވެ. މިއީ 13 ވަނަ ގަރުނުގެ ނުފޫޒު ގަދަ ރަސްކަލެކެވެ. މިއީ ނެގަޓިވް ކެރެކްޓާ އެވެ. އަދި މިއީ ފިލްމެއްގައި ރަންވީރު ނުބައިބައި ރޯލެއް ކުޅޭ ފުރަތަމަ ފަހަރު ވެސް މެ އެވެ.
ދީޕިކާ ޕަދްކޯން އާއި ޝާހިދު ކަޕޫރް ފެނިގެންދާ "ޕަދްމާވަތީ" ސިނަމާތަކަށް އަންނާނީ އަންނަ ޑިސެމްބަރު މަހުގެ އެކެއްގަ އެވެ. މިހާރު ގިނަ ބަޔަކު އެންމެ ބޮޑަށް އިންތިޒާރު ކުރަނީ މި ފިލްމުގެ ޓްރެއިލާއަށެވެ.