އައްޑޫ މަރުކަޒީ އިންޖީނުގޭގެ ބައެއް އިންޖީނުތަކަށް ދިމާވެފައިވާ މައްސަލަ ހައްލު ކުރުމަށް މަސައްކަތް ކުރަމުން އަންނަކަމަށް ފެނަކަ ކޯޕަރޭޝަންއިން ބުނެފިއެވެ.
ފެނަކަ ކޯޕަރޭޝަންގެ މެނޭޖިން ޑިރެކްޓަރ އަހްމަދު ޝަރީފް ސޮއި ކުރައްވައި މިރޭ ނެރުނު ބަޔާނުގައި ބުނެފައިވަނީ ކަރަންޓް ފޯރުކޮށްދިނުމަށް ބޭނުންކުރަމުންދާ ޖަނަރޭޓަރަކަށް މައްސަލަ ދިމާވި ނަމަވެސް، އެހެން ޖަނަރޭޓަރުތައް ބޭނުން ކޮށްގެން އައްޑޫ ސިޓީގެ އެކި ސަރަހައްދުތަކަށް ކަރަންޓް ފޯރުކޮށްދޭ ކަމަށެވެ. އަދި ނުހިފެހެއްޓޭތީ އެކި ސަރަހައްދުތަކުން ކަރަންޓް ކަނޑަމުން އަންނަކަމަށެވެ.
Press Release – Addu cityge karantuge haalathaai gulhey pic.twitter.com/szqdzoF48r
— Fenaka Corporation (@TeamFenaka) October 3, 2017
ފެނަކަ ކޯޕަރޭޝަނުން ބުނީ މައްސަލަ ޖެހުނު ޖަނަރޭޓަރ މަރާމާތު ކުރުމަށް އިންޖިނިއަރުންގެ އަވަސް ހައްލެއް ހޯދުމަށް މެދުނުކެޑި މަސައްކަތް ކުރަމުން އަންނަ ކަމަށެވެ.
އިންޖީނަށް މައްސަލަ ޖެހި ކަރަންޓް ކަނޑަމުން އަންނަ އިރު ބައެއް ސަރަހައްދުތަކުން ނަރުދަމާ އެޅުމަށް ހަވާލުވެފައިވާ އެމްޑަބްލިއުއެސްސީގެ އިހްމާލުން ކޭބަލް ބުރިވެ ދޭތެރެ ދޭތެރެއިން ކަރަންޓް ކެނޑެއެވެ. އަދި ދާދި ފަހުން ޖަނަރޭޓަރެއްގެ ތެރެއަށް ދަވާދު އެޅިގެންވެސް ޖަނަރޭޓަރެއް ނިއްވާލައިގެން ސާވިސް ކުރަން ޖެހުނެވެ.
ފެނަކަ ކޯޕަރޭޝަންގެ އެންމެ ގިނަ ކަސްޓަމަރުން ތިބި އައްޑޫ ސިޓީގެ ކަރަންޓްގެ މައްސަލަ ހައްލު ކުރުމަށް ފާއިތުވި 5 އަހަރުވެސް އެކަށީގެންވާ މަަސައްކަތެއް ކުރެވިފައި ނުވެއެވެ.
ފެނަކަ ކޯޕަރޭޝަންގެ އޮޑިޓް ރިޕޯޓްގައިވާ ގޮތުން އައްޑޫގެ ކަރަންޓްގެ ކަންކަން ހައްލުކުރުމުގެ ބަދަލުގައި ހިންގާފައިވަނީ ކަރަންޕްޝަންގެ ބޮޑެތި ޖަރީމާތަކެވެ.