ފިލްމްތައް ޕްރޮޑިއުސް ކުރުމުގެ އިތުރުން ލޯބިވެރިޔާ އަދި ކްރިކެޓް ކުޅުންތެރިޔާ ވިރާޓް ކޯލީއާ ގުޅިގެން ރެސްޓޯރަންޓް ހިންގުމުގެ ވިޔަފާރީގެ ތެރެއަށް ވެސް ވަންނަން ނިންމާފައިވާ ބޮލީވުޑްގެ މަޝްހޫރު ބަތަލާ އަނުޝްކާ ޝަރްމާ އޭނާގެ އަމިއްލަ ކްލޯތިން ލައިނެއް ލޯންޗްކޮށްފި އެވެ.
އިއްޔެ ލޯންޗް ކުރި މި ކްލޯތިން ލައިނަށް ނަން ދީފައި ވަނީ އަނުޝްކާ ނަމާ ވެސް ގުޅުވައިގެން "ނަޝް" ގެ ނަމުންނެވެ. ކާމިޔާބު ފިލްމްތަކެއް ކުޅެފައިވާ ހުނަރުވެރި ބަތަލާ ބުނީ އަމިއްލަ ކްލޯތިން ލައިނެއް ލޯންޗް ކުރީ އެކަމަށް މަސައްކަތް ކުރާތާ ހަތަރު އަހަރެއްހާ ދުވަސް ފަހުން ކަމަށެވެ.
އޭނާ ބުނީ "ނަޝް" އަކީ އޭނާގެ އަމިއްލަ ސްޓައިލާ ވެސް ވަރަށް ބޮޑަށް ގުޅޭ ކަހަލަ ފަރުމާތަކެއް އާންމުންނަށް ލިބޭ ގޮތަށް ފަރުމާކޮށްފައިވާ ބްރޭންޑެއް ކަމަށެވެ.
The story of #NUSH ❤? @NushBrand https://t.co/k3lBEF2lAh
— Anushka Sharma (@AnushkaSharma) October 3, 2017
"ނަޝްގެ އުފެއްދުންތައް ޒުވާން އަންހެން ކުދިންނާ ވަރަށް ބޮޑަށް ގުޅޭނެ. އެކަމަށް ވަރަށް ބޮޑަށް އިސްކަމެއް ދީގެން މި ބްރޭންޑްގެ އުފެއްދުންތައް ފަރުމާކޮށްފައި ހުންނާނީ،" އަނުޝްކާ ބުންޏެވެ. "ނަޝްގެ ތެރެއިން ލިބޭނެ ހުރިހާ ވައްތަރެއްގެ ހެދުމެއް. އޭގެ ތެރޭގައި ހަވީރީ ހެދުމާއި އޮފީސް ހެދުމާއި އެކި ކަހަލަ ހަފުލާތަކާ ގުޅޭ ކަހަލަ ހެދުންތައް ވެސް ހިމެނޭނެ."
ސުދިތީ އިންޑަސްޓްރީޒާ ގުޅިގެން ލޯންޗް ކުރި "ނަޝް" ގެ އުފެއްދުންތައް ޝޮޕާޒް ސްޓޮޕާއި މަންތުރާ ފަދަ ޕްލެޓްފޯމްތަކުން މިހާރު ގަންނަން ލިބޭނެ އެވެ.
ބޮލީވުޑް ބަތަލާއިންގެ ތެރެއިން އަމިއްލަ ކްލޯތިން ބްރޭންޑެއް ގެންގުޅޭ ތަރިންގެ ތެރޭގައި ސޯނަމް ކަޕޫރް، އާލިއާ ބަޓް، ކަންގަނާ ރަނާވަތު އަދި ޝްރަދާ ކަޕޫރާއި ދީޕިކާ ޕަދްކޯން ފަދަ ޒުވާން ތަރިން ހިމެނެ އެވެ.