އައްޑޫގައި ޑެންގީއާ ގުޅޭ ނޮލެޖް، އެޓިޓިއުޑް އެންޑް ޕްރެކްޓިސެސް (ކެޕް) ސާވޭއެއް ހެލްތު ޕްރޮޓެކްޝަން އެޖެންސީ (އެޗްޕީއޭ) އިން ފަށައިފި އެވެ.
އެ އޮތޯރިޓީން އައްޑޫ ސިޓީ ކައުންސިލާއެކު އިއްޔެ ބޭއްވި ބައްދަލުވުމެއްގައި އެޗްޕީއޭ ބުނީ މި ސާވޭއަކީ ޑެންގީއާ ބެހޭ ގޮތުން އާންމުންގެ ހޭލުންތެރިކަން ހުރި މިންވަރު ދަނެގަތުމަށާއި، ޑެންގީއާ މެދު މީހުން ދެ ކޭގޮތް ހޯދައި ޑެންގީން ސަލާމަތްވުމަށް މިހާރު ގެންގުޅޭ އާދަކާދަ ބަލައި ދަނެގަތުމަށް ހިންގާ ސާވޭއެއް ކަމަށެވެ.
އައްޑޫގެ ހުރިހާ އަވަށެއްގައި ވެސް ކުރިއަށް ގެންދާ މި ސާވޭ މި މަހުގެ 16 ވަނަ ދުވަހާ ހަމައަށް ކުރިއަށްދާނެ އެވެ. މި މުއްދަތުގައި 352 ފަރާތަކާ ސުވާލުކޮށް މަޢުލޫމާތު އެއް ކުރުމަށް ވަނީ ހަމަޖެހިފަ އެވެ.
މި ދުވަސްވަރަކީ ވިއްސާރަ މޫސުމުގެ ދުވަސްތައް ކަމުން ވާރޭވެހި ފެން ހަރުލާފައި ހުންނަ ތަންތަން ހޯދައި ފެން ހިންދުމަކީ މަދިރިފަނި އާލާވިޔަ ނުދިނުމަށާއި ޑެންގީއިން ރައްކާތެރިވުމަށް އެޅޭނެ ވަރަށް މުހިންމު ފިޔަވަޅެކެވެ.