ޝާހިދު ކަޕޫރު ސޮއިކޮށްފައިވާ ޝްރީ ނަރަޔަން ސިންގްގެ ފިލްމް "ރޯޝްނީ" ގެ ބަތަލާގެ ރޯލް ކެޓްރީނާ ކެއިފަށް ހުށަހަޅާފައިވާ ކަމަށް މީޑިއާ ރިޕޯޓްތައް ބުނެފި އެވެ.
މި ފިލްމަކީ ދާދި ފަހުން ރިލީޒް ކުރި އަކްޝޭ ކުމާރްގެ "ޓޮއިލެޓް" އަށް ފަހު ނަރަޔަން ލިޔެ، ޑައިރެކްޓް ކުރާ ފުރަތަމަ ފިލްމެވެ. ފިލްމްގެ ވާހަކަ ބިނާކޮށްފައި ވަނީ އިންޑިއާގެ ކަރަންޓް ބިލް ބޮޑުވާ މައްސަލައިގެ މައްޗަށެވެ.
ރިޕޯޓްތައް ބުނާ ގޮތުން މިހާރު ލޮސް އެންޖަލިސްގައި ހުރި ކެޓްރީނާ އެމެރިކާ އަށް ފުރުމުގެ ކުރިން "ރޯޝްނީ" ގެ ބަތަލާގެ ރޯލް އޭނާ އަށް ވަނީ ހުށަހަޅައިފަ އެވެ. އަދި ފިލްމްގެ ސްކްރިޕްޓާ ދޭތެރޭ ކެޓްރީނާ ވަރަށް ހިތްހަމަޖެހޭ ކަމަށްވެ އެވެ.
މި ފިލްމަށް ކެޓްރީނާ ސޮއިކޮށްފި ނަމަ، ވެެގެން ދާނީ ޝާހިދުއާ އެކު ކުޅޭ ފުރަތަމަ ފިލްމަށެވެ. އެހެންވެ މިއީ ބެލުންތެރިންނަށް އަނެއްކާ ވެސް ބޮޑު ސްކްރީނުން ތާޒާ ޖޯޑެއް ފެނިގެން ދާނެ ފިލްމަކަށް ވާނެ އެވެ.
ޝާހިދު ދެން އެންމެ އަވަހަށް ފެނިގެން ދާނީ އަންނަ ޑިސެމްބަރު މަހު ރިލީޒް ކުރާ "ޕަދްމާވަތީ" އިންނެވެ. ކެޓްރީނާ މިހާރު އަންނަނީ ތިން ފިލްމެއްގެ މަސައްކަތް ކުރަމުންނެވެ.
އެއީ ސަލްމާން ހާނާ އެކު ކުޅޭ "ޓައިގާ ޒިންދާ ހޭ" އާއި ޝާހްރުކް ހާންއާ އެކު ކުޅޭ ފިލްމަކާއި އާމިރް ހާނާ އެކު ކުޅޭ "ތަގްސް އޮފް ހިންދުސްތާން" ގަ އެވެ.