އަގައުމީ އެއާލައިން މޯލްޑިވިއަން އޮޕަރޭޓް ކުރާ އައިލެންޑް އޭވިއޭޝަން ސާވިސް (އައިއޭއެސް) އިން ޕައިލެޓުން ތަމްރީނު ކުރުމުގެ ޕްރޮގްރާމެއް ފަށަން ނިންމައިފި އެވެ.
އެ ކުންފުނިން ބުނީ މި ޕްރޮގްރާމްގެ ކޯސްތައް މި އަހަރުގެ ފަހުކޮޅު ފެށުމަށް ތައްޔާރުވަމުން އަންނަ ކަމަށެވެ.
އައިއޭއެސްގެ މެނެޖިން ޑިރެކްޓަރު އަބްދުލް ހާރިސް ވިދާޅުވީ ވެލާނާ އިންޓަނޭޝަނަލް އެއާޕޯޓް ތަރައްގީ ކުރަމުން އަންނަ އިރު ރާއްޖެ އަންނަ ފަތުރުވެރިންގެ އަދަދު ވެސް އެތައް ގުނައެއް އިތުރުވެގެން ދާނެ ކަމަށެވެ. އެހެންވެ އެ މަޝްރޫއާ އެކު ރިސޯޓްތަކަށް ޑޮމެސްޓިކް ފްލައިޓްތަކުގައި ދަތުރު ކުރާ ފަތުރުވެރިންގެ އަދަދު އިތުރުވެ ޑިމާންޑާ އެއްވަރަށް ޑޮމެސްޓިކް ފްލައިޓްތައް އިތުރު ކުރަން ޖެހޭނެ ކަމަށް ވިދާޅުވި އެވެ.
އެހެންވެ ގިނަ އަދަދެއްގެ ޕައިލެޓުން ވެސް ބޭނުންވާނެ ކަމަށް ހާރިސް ވިދާޅުވި އެވެ. އޭނާ ވިދާޅުވީ ދިވެހި ޕައިލެޓުން ލިބުމުގައި ދަތިތައް ނައްތައިލެވޭނީ ވެސް ޕައިލެޓުން ތަމްރީނުކޮށްގެން ކަމަށެވެ.
އައިއޭއެސް އިން ބުނީ ކޯސްތައް ހިންގާނެ ވަކި އުސޫލެއް އަދި މުޅިން ފައިނަލް ނުވާ ކަމަށެވެ. އެކަމަކު ރާއްޖެ އާއި ރާއްޖޭން ބޭރުގައި ކޯސްތައް ކުރިއަށް ގެންދިއުމުގެ ވިސްނުން ހުރި ކަމަށް އެ ކުންފުނިން ބުންޏެވެ.
އައިއޭއެސްގައި މިހާރު ވެސް 100 އަށް ވުރެ ގިނަ ޕައިލެޓުން ވަޒީފާ އަދާ ކުރާ އިރު، އޭގެ ތެރެއިން 90 ޕަސަންޓަކީ ދިވެހި ޕައިލެޓުންނެވެ.