މިދިޔަ މަހުގެ ތެރޭގައި ޖުމްހޫރީ ޕާޓީގެ ރިޔާސީ ކެންޑިޑޭޓް ގާސިމް އިބްރާހީމް އައްޑު އަށް ވަޑައިގެން މީދޫ ރައްޔިތުންނާ އެކު ބޭއްވި ބައްދަލުވުމުގައި އެ ރަށު ނެރު ފުންކޮށް މިހާރަށް ވުރެ އެތަން ފުޅާކޮށް ދިނުމަށް އެދިފައިވާތީ އެ މަސައްކަތް ކުރުމަށް ބޭނުންވާ ތަކެތި އައްޑު އަށް ގެނައުމުގެ މަސައްކަތް ކުރަމުން އަންނަ ކަމަށް ޖުމްހޫރީ ޕާޓީން ބުނެފި އެވެ.
ހުޅުމީދޫގައި ޖުމްހޫރީ ޕާޓީގެ ފަރާތުން އިސްކޮށް ހަރަކާތްތެރިވާ މުހައްމަދު ސޯލިހް ބުނީ މީދު އާއި އިސްމެހެލާހެރަ ދިމާލުމުގެ ނެރުގެ މަސައްކަތް ކުރަން ވިލާގެ ބާޖެއް އަންނަ މަހުގެ 15 ހިސާބުގައި މީދު އަށް ގެންނާނެ ކަމަށެވެ.
"އެ މަސައްކަތަށް ބޭނުންވާ ބާޖާއި އިތުރު ސާމާނާ އެކު ބާޖް އަންނާނީ. މިހާރު ބާޖްގެނައުމުގެ މަސައްކަތް އެބަހިގާ،" ސޯލިހް ބުންޏެވެ. "ހިލޭ މިކަން ކުރެވޭތީ ވަރަށް ހިތްހަމަޖެހޭ. އަދި މިއީ ރައްޔިތުން ވަރަށް ބޮޑަށް ބޭނުންވެފައި އޮތް ކަމެއް. ކައުންސިލުން މިކަމަށް އެހީތެރިކަމާއި އެއްބާރުލުން ދޭނެ ކަމަށް އަޅުގަނޑުމެން އުންމީދު ކުރަން.
ކައުންސިލަރު އަބްދުﷲ ތޮއްްޔިބް (ޓޮމް) ވިދާޅުވީ އެކަމާ ބެހޭ މައުލޫމާތު ކައުންސިލަށް ލިބިފައިވާ ކަމަށެވެ. އަދި އެކަމަށް މަރުހަބާ ވެސް ކިޔާ ކަމަށެވެ. އެކަމަކު އެފަދަ މަސައްކަތެއް ކުރުމުގެ ކުރިން ބަލަން ޖެހޭ ކަންކަން ހުންނާނެ ކަމަށް އޭނާ ވިދާޅުވި އެވެ. އެހެންވެ ކައުންސިލުން ބަލަން ޖެހޭ ކަންކަން ބަލައި، އެކަން ކުރުމަށް އެހީތެރިކަން ފޯރުކޮށް ދޭނެ ކަމަށް ޓޮމް ވިދާޅުވި އެވެ.
އޭނާ ވިދާޅުވީ ނެރު ފުން ކުރުން ކަހަލަ ކަމެއް ކުރާ އިރު އީއައިއޭ ވެސް ހަދަން ޖެހޭ ކަަމަށެވެ.
"އޭގެ އިތުރުން ވެސް ބަލަން ޖެހޭ ކަންކަން ބެލުމަށް ފަހު، އެކަން ކުރަން އުޅެނީ އެންމެ ރަނގަޅަށްތޯ ކައުންސިލުން ބަލާނެ." ޓޮމް ވިދާޅުވި އެވެ.