އައްޑޫގައި ސާފު ކުރުމުގެ ބޮޑު ހަރަކާތެއް ބާއްވަން ނިންމާފައިވާ ކަމަށް ހައުސިން މިނިސްޓްރީން ބުނެފި އެވެ.
އެ މިނިސްޓްރީން ބުނީ ކްލައިމެޓް ޗޭންޖް އެޑަޕްޓޭޝަން (ސީސީއޭޕީ) ގެ ދަށުން އާންމުން ހޭލުންތެރިކަން އިތުރު ކުރުމުގެ ޕްރޮގްރާމްގެ ތެރެއިން އެންވަޔަރަމަންޓް މި ނިސްޓްރީން އިސް ނަގައިގެން ބާއްވާ ސާފު ކުރުމުގެ ހަރަކާތް އޮންނާނީ މި މަހުގެ 14 ގައި ކަމަށެވެ.
އެގޮތުން މި ހަރަކާތުގައި ސަރުކާރުގެ މުއައްސަތަކާއި ރައްޔިތުންނާ ގުޅިގެން ހިމާޔަތްކޮށްފައިވާ ޞަރަޙައްދުތަކާއި އެތަންތަނަށް ދާ މަގުތަކާއި އައްޑޫގެ ބޮޑެތި މަގުތަކާއި އެތަންތަނާ ގުޅިފައިވާ ދަޢުލަތުގެ ބިންތަކުގައި ހުރި ހަލާކުވެ ގިނަ ދުވަސްވެފައިވާ ވެހިކަލްތަކާއި ބާ ދަގަނޑާއި ކުނިބުނި ނަގައި އެ ކަމަށް ޚާއްޞަ ކުރެވިފައިވާ ތަންތަނަށް ޖަމާ ކުރާނެ ކަމަށް މިނިސްޓްރީން ބުންޏެވެ.
މިނިސްޓްރީން ބުނީ ސާފު ކުރުމުގެ ހަރަކާތުގެ ތެރެއިން ގެންދެވޭ ތަކެއްޗަށް ލިބޭ ގެއްލުމަކަށް މި މިނިސްޓްރީން ޒިންމާ ނުނަގާނެ ކަމަށެވެ.