އައްޑޫގައި މިނެރެލް ވޯޓާ ފެން ފުޅި ބަންދު ކުރާ ބޮޓްލިން ޕްލާންޓެއް ގާއިމު ކުރުމަށް ދިވެހި އަމިއްލަ ކުންފުންޏަކަށް ބިން ދޫކޮށްފައިވާ ކަމަށް އައްޑޫ ސިޓީ ކައުންސިލުން ބުނެފި އެވެ.
ކައުންސިލަރު އަބްދުﷲ ތޮއްޔިބް (ޓޮމް) މިއަދު ވިދާޅުވީ ބޮޓްލިން ޕްލާންޓެއް ގާއިމު ކުރުމުގެ ޝައުގުވެރިކަން ފާޅުކޮށް ކައުންސިލަށް ހުސަހެޅުމާ ގުޅިގެން އެ މަސައްކަތަށް 9،000 ސްކްއާ މީޓަރުގެ ބިން ދޫކޮށްފައިވާ ކަމަށެވެ. އަދި ބިން ދޫކުރީ އާރްއޭއެފް މަރުކަޒީ އިންޖީނުގެ ސަރަހައްދުން ކަމަށް ވެސް އޭނާ ވިދާޅުވި އެވެ.
އެހެން ނަމަވެސް ބޮޓްލިން ޕްލާންޓް ގާއިމު ކުރުމަށް ބިން ދޫކުރީ ކޮން ކުންފުންޏަކަށް ކަމެއް ޓޮމް ވިދާޅެއް ނުވެ އެވެ. އޭނާ ވިދާޅުވީ ތަޖުރިބާ އާއި ގާބިލްކަން ހުރި ދިވެހި ކުންފުންޏެއް ކަމަށެވެ.
ޓޮމް ވިދާޅުވީ އެ ފަރާތާ އެކު ބިން ހަވާލު ކުރުމުގެ އެއްބަސްވުމުގައި އަންނަ ހަފުތާގެ ތެރޭގައި ސޮއި ކުރެވޭނެ ކަމަށެވެ.
ކައުންސިލުން ބުނީ އައްޑޫގައި ތަފާތު މަޝްރޫއުތައް ހިންގުމަށް ޝައުގުވެރިވާ ފަރާތްތަކަށް ޕްރޮޕޯސަލް ހުށަހެޅުމުގެ ފުރުސަތު ދާދި ފަހުން ހުޅުވާލުމުން ފަސް ފަރާތަކުން އެކަމަށް ކުރިމަތިލި ކަމަށެވެ.
އޭގެ ތެރެއިން އެންމެ ފަރާތެއް ފިޔަވައި އެހެން ހުރިހާ ފަރާތްތަކުން ޕްރޮޕޯސަލް ހުށަހެޅީ ޓޫރިޒަމާ ގުޅުން ހުރި މަސައްކަތްތަަކަށް ކަމަށް ކައުންސިލުން ބުންޏެވެ.