ޕްރޮޑިއުސަރު ރަމޭޝް ތައުރާނީގެ "ރޭސް 3" އަށް ސަލްމާން ހާން ސޮއި ކުރި ހަބަރާ އެކު، އެ ފިލްމުގެ ކާސްޓާ ބެހޭ ގޮތުން ތަފާތު ވާހަކަތަކެއް އަންނަނީ ދެކެވެމުންނެވެ. ޔަގީންވާ ކަމަކީ ފިލްމުން ސަލްމާނާ އެކު ބަތަކާ ޖެކްލީން ފެނަންޑޭޒް ވެސް ފެނިގެން ދާނެ ކަމެވެ.
ހަމަމިއާ އެކު ކާސްޓަށް އަލަށް އިތުރުވި މެމްބަރަކީ ފިލްމްތަކުން މިހާރު ވަރަށް މަދުން ނޫނީ ނުފެންނަ އެކްޓަރު ބޮބީ ޑިއޯލް އެވެ. ދާފި ފަހުން ރިލީޒް ކުރި "ޕޯސްޓަ ބޯއި" ގައި މުހިއްމު ރޯލެއް ކުޅުނު ބޮބީ "ރޭސް 3" އަށް ސޮއި ކުރިކަން ރަމޭޝް ވަނީ ޓްވިޓާގައި އިއުލާންކޮށްފަ އެވެ.
އޭނާ ބުނީ އެ އާއިލާއާ ބޮބީ ގުޅިފައިވާ ކަމަށާއި މިއީ ފިލްމަށް ލިބޭނެ އިތުރު ފުރިހަމަ ކަމެއް ކަމަށެވެ. ރަމޭޝްގެ އެހެން ދެ ފިލްމެއްގައި ބޮބީ މީގެ ކުރިން ވަނީ މަސައްކަތްކޮށްފަ އެވެ. އެއީ "ނަގާބް" އާއި "ސޮލްޖާ" އެވެ.
"ރޭސް 3" ގެ ކާސްޓަށް ބޮބީ އައިކަން ކަށަވަރުވެފައިވާ އިރު، އެ ފިލްމުގެ މުހިއްމު ރޯލްތަކެއް އަމީތާބް ބައްޗަން، ސިދާތު މަލްއުތުރާ، އިމްރާން ހާޝިމީ، ވިކީ ކޯޝަލް އަދި ސޫރަޖް ޕަންޗޯލީ ފަދަ އެކްޓަރުންނަށް ހުށަހަޅާފައިވާ ކަމަށް އަޑުތައް ފެތުރިފައިވެ އެވެ.
Welcome to the family #BobbyDeol @BeingSalmanKhan @Asli_Jacqueline #Race3 #Eid2018
— Ramesh Taurani (@RameshTaurani) October 11, 2017
ނަމަވެސް ރަމޭޝް ބުނީ ސަލްމާނާއި ޖެކްލިން އަދި ބޮބީގެ އިތުރުން ފިލްމުގެ ކާސްޓަށް ދެން އެއްވެސް އެކްޓަރަކު އަދި ފައިނަލް ނުކުރާ ކަމަށެވެ. އެކަމަކު ވަރަށް އަވަހަށް މުޅި ކާސްޓް އެނގިގެން ދާނެ ކަމަށް ބުންޏެވެ.
ރެމޯ ޑި ސޫޒާ ޑައިރެކްޓް ކުރާ "ރޭސް 3" ގެ ޝޫޓިން ފަށަން ހަަމަޖެހިފައި ވަނީ އަންނަ މަހު އެވެ.
މި ފިލްމަކީ ސަސްޕެންސް ތުރިލާތައް އުފައްދަން މަޝްހޫރު ޑައިރެކްޓަރުން ކަމަށްވާ އައްބާސް-މަސްތާން ގެނެސް ދިން "ރޭސް" ފްރެންޗައިޒްގެ ތިން ވަނަ ބައެވެ.